அஸ்ஸாமில் பாரத் ஜோடோ நியாய யாத்திரையின்போது, அனுமதி வழங்கப்படாத சாலையில் பயணம் மேற்கொண்டதாக காங்கிரஸ் கட்சியின் எம்.பி. ராகுல் காந்தி மீது போலீஸார் தாமாக முன்வந்து வழக்குப் பதிவு செய்திருக்கிறார்கள்.
அகில இந்திய காங்கிரஸ் கட்சியின் முன்னாள் தலைவரும், கேரள மாநிலம் வயநாடு தொகுதியின் எம்.பி.யுமானவர் ராகுல் காந்தி. இவர், 2022-ம் ஆண்டு பாரத் ஜோடோ எனப்படும் இந்திய ஒற்றுமை யாத்திரையை தொடங்கி 2023 ஜனவரியில் நிறைவு செய்தார்.
தொடர்ந்து, இந்த ஆண்டு 2-வது கட்டமாக ‘பாரத் ஜோடோ நியாய’ யாத்திரை எனப்படும் இந்திய ஒற்றுமை மற்றும் நீதிக்கான யாத்திரையை கடந்த 14-ம் தேதி மணிப்பூரில் தொடங்கினார். இந்த யாத்திரை, 15 மாநிலங்களில் 67 நாட்கள் 6,712 கி.மீ. தூரம் நடைபெற உள்ளது. இந்த யாத்திரை மார்ச் 20-ம் தேதி மும்பையில் நிறைவடைகிறது.
இந்த நிலையில், அஸ்ஸாம் மாநிலத்தில் இந்த யாத்திரைக்கு ஜோர்ஹட் மாவட்டம் கே.பி. சாலையில் அனுமதி வழங்கப்பட்டிருந்தது. ஆனால், ராகுல் காந்தியோ வேறு சாலை வழியாக அத்துமீறி யாத்திரை சென்று, அங்கிருந்த மக்களை சந்தித்து உரையாடினார்.
ராகுல் காந்தி வந்திருப்பதை அறிந்த மக்கள், அவரை பார்ப்பதற்காக முண்டியடித்துக் கொண்டு சென்றனர். இதனால் பயங்கர கூட்ட நெரிசல் ஏற்பட்டது. அப்போது, சிலர் மயங்கி விழுந்தனர். இதனால் அப்பகுதியில் பெரும் பரபரப்பு ஏற்பட்டது.
இதையடுத்து, அனுமதிக்கப்பட்ட பாதையில் செல்லாமல், அத்துமீறியதாக ராகுல் காந்தி மீது ஜோர்ஹட் சதார் காவல் நிலைய போலீஸார் சூமோட்டோ எஃப்.ஐ.ஆர். எனப்படும் தாமாக முன்வந்து முதல் தகவல் அறிக்கையை பதிவு செய்திருக்கிறார்கள்.
