தூத்துக்குடியிலிருந்து வேளாங்கண்ணிக்கு சென்ற கார், தஞ்சை அருகே தடுப்புச் சுவர் மீது மோதி விபத்துக்குள்ளானது. இந்த விபத்தில், 4 பேர் உயிரிழந்தனர்.
தூத்துக்குடி இந்திரா நகரைச் சேர்ந்த 11 பேர் வேளாங்கண்ணிக்கு நேற்று இரவு காரில் பயணம் மேற்கொண்டனர். அவர்கள் இன்று அதிகாலை தஞ்சாவூர் மாவட்டம் சேதுபாவாசத்திரம் சென்றுகொண்டிருந்தது. மனேரா பகுதி வழியாக கார் சென்றபோது, ஓட்டுநரின் கட்டுப்பாட்டை இழந்த கார், அப்பகுதியில் இருந்த தடுப்பு சுவரின் மீது மோதியது.
அதிவேகமாக சுவரின் மீது மோதியதால், காரின் முன்பக்கம் நொறுங்கியது. இந்த கோர விபத்தில் ராணி, சின்னபாண்டி, பாக்கியராஜ், ஞானம்மாள் ஆகியோர் சம்பவ இடத்திலேயே உயிரிழந்தனர். மேலும், 7 பேர் படுகாயமடைந்தனர்.
இதுகுறித்து அப்பகுதியில் இருந்த மக்கள் போலீசாருக்கு தகவல் கொடுத்தனர். தகவலின் பேரில் விரைந்து வந்த போலீசார், படுகாயமடைந்த 7 பேரையும் மீட்டு, 108 ஆம்புலன்ஸ் மூலம் தஞ்சாவூர் அரசு மருத்துவக்கல்லூரி மருத்துவமனைக்கு அனுப்பி வைத்தனர்.
இதை அடுத்து, இறந்த நான்கு பேரின் உடல்களையும் மீட்டு, பிரேத பரிசோதனைக்காக பட்டுக்கோட்டை அரசு மருத்துவமனைக்கு அனுப்பி வைத்தனர்.
விபத்துக்கான காரணம் குறித்து சேதுபாவாசத்திரம் போலீசார் வழக்குப்பதிவு செய்து விசாரணை மேற்கொண்டு வருகின்றனர்.
