குடியரசுத் தலைவர் திரௌபதி முர்மு, 18 மாநிலங்கள் மற்றும் யூனியன் பிரதேசங்களைச் சேர்ந்த 9 சிறுவர்கள், 10 சிறுமிகளுக்கு இந்த ஆண்டுக்கான பிரதான் மந்திரி ராஷ்ட்ரீய பால் புரஸ்கார் விருதை வரும் 22-ம் தேதி வழங்குகிறார்.
கலை மற்றும் கலாச்சாரம், அறிவியல் மற்றும் தொழில்நுட்பம், விளையாட்டு, சமூக சேவை உட்பட 6 துறைகளில் சிறந்து விளங்கும் 5 முதல் 18 வயதுக்குட்பட்ட குழந்தைகளுக்கு இந்திய அரசாங்கம் பிரதான் மந்திரி ராஷ்ட்ரீய பால் புரஸ்கார் விருதை ஆண்டுதோறும் வழங்கி வருகிறது. இந்த விருது பெறும் ஒவ்வொருவருக்கும் ஒரு பதக்கமும், சான்றிதழும் வழங்கப்படும்.
அந்த வகையில், இந்த ஆண்டுக்கான பிரதான் மந்திரி ராஷ்ட்ரீய பால் புரஸ்கார் விருது, கலை மற்றும் கலாச்சாரம் (7), துணிச்சல் (1), புத்தாக்கம் (1), அறிவியல் மற்றும் தொழில்நுட்பம் (1), சமூக சேவை (4), விளையாட்டு (5) ஆகிய பிரிவுகளில் சிறந்து விளங்கிய 18 மாவட்டங்கள் மற்றும் யூனியன் பிரதேசங்களைச் சேர்ந்த 9 சிறுவர்கள், 10 சிறுமிகள் என மொத்தம் 19 பேருக்கு வழங்கப்படுகிறது.
இதுகுறித்து பெண்கள் மற்றும் குழந்தைகள் மேம்பாட்டு அமைச்சகம் வெளியிட்டிருக்கும் செய்திக்குறிப்பில், “2024-ம் ஆண்டுக்கான பிரதான் மந்திரி ராஷ்ட்ரீய பால் புரஸ்கார் விருது, 9 சிறுவர்கள், 10 சிறுமிகள் என மொத்தம் 19 பேருக்கு வழங்கப்படுகிறது. இவ்விருதுகளை குடியரசுத் தலைவர் திரௌபதி முர்மு வரும் 22-ம் தேதி விக்யான் பவனில் நடைபெறும் விழாவில் வழங்குகிறார்.
தொடர்ந்து, பிரதான் மந்திரி ராஷ்ட்ரீய பால் புரஸ்கார் விருது பெற்றவர்களுடன் ஜனவரி 23-ம் தேதி பிரதமர் நரேந்திர மோடி உரையாடுகிறார். மேலும், பெண்கள் மற்றும் குழந்தைகள் மேம்பாட்டுத் துறை அமைச்சர் ஸ்மிருதி இரானி, மாநில அமைச்சர் முன்ஜ்பரா மகேந்திரபாய் ஆகியோர் விருது பெற்ற குழந்தைகளுடன் உரையாடி வாழ்த்துவார்கள்” என்று தெரிவிக்கப்பட்டிருக்கிறது.
