தெலுங்கானா மாநிலம் ஐதராபாத் சர்வதேச விமான நிலையத்தில், பயணி ஒருவர் கடத்தி வந்த ரூ.41.44 கோடி மதிப்பிலான ஹெராயின் போதைப்பொருளை சுங்கத்துறை அதிகாரிகள் அதிரடியாக பறிமுதல் செய்தனர்.
தெலுங்கானா மாநிலம் ஐதராபாத்தில் உள்ள ராஜீவ் காந்தி சர்வதேச விமான நிலையத்தில் இருந்து பல்வேறு நாடுகளுக்கு விமானங்கள் இயக்கப்பட்டு வருகின்றன.
இந்த விமான நிலையத்திற்கு வெளிநாடுகளிலிருந்து வரும் பயணிகள் சிலர் தங்கள் உடமைகள் மற்றும் உடைகளில் மறைத்து வைத்து தங்கம் உட்பட பல பொருட்களைக் கடத்தி வருவதும், இதை சுங்கத்துறை அதிகாரிகள் கண்டுபிடித்து, அதிரடியாக பறிமுதல் செய்து வருவதும் வாடிக்கையாகி விட்டது.
இந்நிலையில், ஐதராபாத் விமான நிலையத்தில் போதைப்பொருள் கடத்தப்படுவதாக சுங்கத்துறை அதிகாரிகளுக்கு ரகசிய தகவல் கிடைத்தது. இதன் பேரில், விமான நிலையத்திற்கு வெளிநாடுகளில் இருந்து வரும் பயணிகளை அதிகாரிகள் தீவிர சோதனை நடத்தினர்.
அப்போது, சிங்கப்பூரில் இருந்து வந்த பயணி ஒருவர் மீது சந்தேகம் அடைந்த அதிகாரிகள் அவரை சோதனை செய்தனர். சோதனையில், 5.9 கிலோ ஹெராயின் போதைப் பொருளை உடமைகளில் மறைத்து வைத்து கடத்தி வந்திருப்பதை அதிகாரிகள் கண்டுபிடித்தனர். இதன் சர்வதேச மதிப்பு 41 கோடியே 44 லட்ச ரூபாய் இருக்கும் என்று அதிகாரிகள் தெரிவித்தனர்.
இதை அடுத்து ஹெராயின் போதைப்பொருளை பறிமுதல் செய்த அதிகாரிகள், கடத்தலில் ஈடுபட்ட பயணியை கைது செய்து விசாரணை மேற்கொண்டு வருகின்றனர்.
