வாட்ஸ்அப் செயலி மூலம் செய்யப்படும் சைபர் குற்றங்கள் மற்றும் பொருளாதார மோசடிகளுக்கு எதிராக ஆலோசனை, எச்சரிக்கையை மத்திய அரசு வழங்கி உள்ளது.
இந்தியாவில் செல்போன் பயன்படுத்துவோர்களில், சுமார் 40 கோடி பேர் வாட்ஸ்அப் செயலியைப் பயன்படுத்துகின்றனர். இந்த செயலி மூலம் அரங்கேற்றப்படும் பல்வேறு சைபர் குற்றங்கள் மற்றும் பொருளாதார மோசடிகளுக்கு எதிராக ஆலோசனை மற்றும் எச்சரிக்கையை மத்திய அரசு வழங்கி உள்ளது.
இதுகுறித்து, மத்திய உள்துறை அமைச்சகத்தின் கீழ் இயங்கும், காவல் ஆராய்ச்சி மற்றும் மேம்பாட்டு அமைப்பு வெளியிட்டுள்ள அறிக்கையில் கூறியிருப்பதாவது, வாட்ஸ்அப் தகவல் பரிமாற்ற ஊடகத்தைப் பயன்படுத்தி பல்வேறு விதமான மோசடிகள் நடப்பதை கண்டறிந்துள்ளோம்.
வீடியோகால், செல்போன் திரையை பகிர்ந்து கொள்ளுதல், வேலை வாங்கி தருவதாக வரும் அழைப்புகள், முதலீட்டு திட்டங்கள், ஆள்மாறாட்டம், மொபைல் போனை தங்கள் கட்டுப்பாட்டில் எடுத்துக் கொள்வது, ‘மிஸ்டு கால்’ உள்ளிட்ட பல வழிகளில் இந்த முறைகேடுகள் நடக்கின்றன.
வாட்ஸ்அப் பயனாளரின் செல்போனை தங்கள் கட்டுப்பாட்டில் எடுத்துக் கொள்ளும் மோசடியில் ஈடுபடும் நபர்கள், அவர்களின் தொடர்பில் உள்ள நபர்களிடம் பணம் கேட்டு முறைகேடு செய்கின்றனர்.
வாட்ஸ்அப் வீடியோகால் மூலம், ஆபாச உரையாடல் மற்றும் ஆடைகளின்றி உரையாடி, அந்த காட்சிகளை வைத்து, பயனாளர்களை மிரட்டி பணம் பறிக்கும் மோசடிகளும் அரங்கேறுகிறது.
இதேபோல், வெளிநாட்டு எண்களில் இருந்து மிஸ்டுகால் வருவதும் அதிகரித்துள்ளது. குறிப்பாக, வியட்நாம், கென்யா, எத்தியோப்பியா, மலேசியா உள்ளிட்ட நாடுகளின் எண்களிலிருந்து இந்த அழைப்புகள் வருகின்றன. இதுபோன்ற தவறான அழைப்புகளை ஏற்க வேண்டாம்.
அறிமுகம் இல்லாத, நபர்களிடம் இருந்து வரும் வாட்ஸ்அப் தகவல்கள், அழைப்புகளை நிராகரிக்கவும் கூறப்பட்டுள்ளது.
