அயோத்தி இராமர் கோவிலில் இன்று கும்பாபிஷேகம் கோலாகலமாக நடைபெற்றிருக்கும் நிலையில், இன்றைய தினம் பெருமை வாய்ந்த தினம் என்று நடிகர் ரஞ்சித் கூறியிருக்கிறார்.
உத்தரப் பிரதேச மாநிலம் அயோத்தியில் 1,800 கோடி ரூபாய் செலவில் மிகவும் பிரம்மாண்டமாக கட்டப்பட்டிருக்கும் ஸ்ரீராமர் கோவிலில் இன்று கும்பாபிஷேகம் மற்றும் இராம் லல்லா பிரான் பிரதிஷ்டை விழா கோலாகலமாக நடைபெற்றது.
இவ்விழாவில் பாரதப் பிரதமர் நரேந்திர மோடி கலந்துகொண்டு இராம் லல்லா சிலையை பிரதிஷ்டை செய்தார். இந்நிகழ்ச்சியில் பிரபல தொழிலதிபர்கள், திரைப் பிரபலங்கள், அரசியல் கட்சிகளின் தலைவர்கள் உள்ளிட்ட பலரும் கலந்து கொண்டு ஸ்ரீராமரை தரிசனம் செய்தனர்.
இந்த நிகழ்ச்சி நாடு முழுவதும் நேரலையில் ஒளிபரப்பு செய்யப்பட்டது. அந்த வகையில், திருப்பூரில் இந்து முன்னணி சார்பில் நேரலைக்கு ஏற்பாடு செய்யப்பட்டிருந்தது. இந்நிகழ்ச்சியில் நடிகர் ரஞ்சித் கலந்துகொண்டு நேரலையில் கும்பாபிஷேகத்தை கண்டு களித்தார்.
பின்னர் செய்தியாளர்களிடம் பேசிய நடிகர் ரஞ்சித், “இன்றைய தினம் பெருமை வாய்ந்த தினம். அனைவரும் எதிர்பார்த்த அற்புதமான நாள். இதில் கலந்து கொண்டது பெருமையாக உள்ளது. இது நம் பூமி. இதை ஒத்துக்கொள்ள வேண்டும்.
நிகழ்ச்சியை பார்க்க விடாமல் மின்சாரம் துண்டிப்பு பிரச்சனை எல்லாம் தேவையற்றது, கண்டிக்கத்தக்கது. இது இறக்குமதி செய்யப்பட்ட சுவாமி இல்லை. இது என் தாய் உணர்வு. கடவுளுக்கு எல்லை இல்லை. இதனை எதிர்க்கும் அன்னிய கைக்கூலிகள் இருக்கத்தானே செய்கின்றனர்.
சுதந்திரத்திற்கு பல உயிர்கள் கொடுக்கப்பட்டுள்ளது. வேற்றுமையில் ஒற்றுமை கொண்ட மதம் நமது இந்து மதம். அனைத்து மதத்தையும் ஏற்கும் மதமும் இந்து மதம்தான். அடுத்த தலைமுறைக்கு இந்த பகுத்தறிவை ஊட்டியதே எதிர்ப்பவர்கள்தான்” என்றார்.
தொடர்ந்து பேசிய இந்து முன்னணி மாநிலத் தலைவர் காடேஸ்வரா சுப்ரமணியம், “500 ஆண்டு காலம் போராடி இன்று வெற்றி விழா நடைபெற்றிருக்கிறது. உலகம் முழுவதும் இராமர் பிரதிஷ்டை நிகழ்ச்சியை கண்டு களிக்கிறார்கள்.
நிறைய மாநிலங்களில் அரசு விடுமுறை அளித்திருக்கிறார்கள். ஆனால், தமிழகத்தில் இந்து விரோத அரசு நடைபெறுகிறது. இந்த அரசு வன்முறையை விரும்புகிறது. இராமரின் விளையாட்டு தொடங்கி விட்டது. இந்த தேர்தலில் இந்து விரோத தி.மு.க. அரசுக்கு இராமர் பாடம் புகட்டுவார்” என்றார்.
