அயோத்தி ராமர் கோவிலில் பொதுமக்கள் தரிசனம் செய்ய இன்று முதல் அனுமதிக்கப்பட்டுள்ள நிலையில், அதிகாலையிலேயே ஏராளமான பக்தர்கள் குவிந்ததால் அங்கு கூட்ட நெரிசல் ஏற்பட்டது.
அயோத்தி ராமர் கோவிலில் நேற்று நண்பகல் குழந்தை ராமர் சிலை பிரதிஷ்டை செய்யப்பட்டது. பால ராமர் விக்கிரகத்தை, பாரதப் பிரதமர் நரேந்திர மோடி பிரதிஷ்டை செய்து வைத்தார். இதில் ஆர்எஸ்எஸ் தலைவர் மோகன்பகவத், உத்தரப்பிரதேச முதலமைச்சர் யோகி ஆதித்யநாத் உள்ளிட்டோர் பங்கேற்றனர்.
அரசியல் தலைவர்கள், சினிமா பிரபலங்கள், தொழிலதிபர்கள், விளையாட்டு வீரர்கள் என நாட்டின் முக்கிய பிரபலங்கள் 7,000 பேர் இந்த விழாவில் சிறப்பு அழைப்பாளர்களாக கலந்து கொண்டனர். சிறப்பு விருந்தினர்கள் 2 மணிக்கு மேல் தரிசனம் செய்ய அனுமதிக்கப்பட்டனர்.
இந்நிலையில் இன்று முதல் பொதுமக்கள் தரிசனம் செய்ய அனுமதிக்கப்பட்டுள்ளனர். காலை 7 முதல் 11.30 மணி வரையும், பிற்பகல் 2 மணிமுதல் இரவு 7 மணி வரையும் பொதுமக்கள் தரிசனம் செய்யலாம் என அயோத்தி ராமர் கோவில் அறக்கட்டளை அறிவித்துள்ளது.
இதனையடுத்து ராமரை தரிசிக்க அதிகாலையிலேயே பக்தர்கள் காத்திருந்தனர். கூட்டம் அதிகமாக இருந்ததால் கோவிலில் கடும் நெரிசல் ஏற்பட்டது. இதனைடுத்து அங்கு ஏராளமான போலீசார் குவிக்கப்பட்டுள்ளனர்.
இதனிடையே காலை 6.30 மணிக்கும், இரவு 7.30 மணிக்கும் நடத்தப்படும் சிறப்புப் பூஜையை காண மக்களுக்கு அனுமதி வழங்கப்படவுள்ளது. இதற்கான முன்பதிவை https://srjbtkshetra.org/ என்ற இணையதளத்தில் செய்ய அறிவுறுத்தப்பட்டுள்ளது
