இராணுவத் தளவாட ஏற்றுமதியில் இந்தியா முன்னணியில் இருப்பதாக பாதுகாப்புத் துறை இணை அமைச்சர் அஜய் பட் தெரிவித்திருக்கிறார்.
இதுகுறித்து மகாராஷ்டிரா மாநிலம் நாக்பூரில் நடைபெற்ற நிகழ்ச்சியில் பேசிய அஜய் பட், “4,666 பாதுகாப்புத் தளவாடங்களின் இறக்குமதிக்கு மத்திய அரசு தடை விதித்திருக்கிறது. இது மிகப்பெரிய சேமிப்புக்கு வழிவகுத்திருக்கிறது.
பாதுகாப்புத் தளவாட உற்பத்தியில் பிற நாடுகளை நம்பி இருக்காமல் இந்தியா தற்சார்பு அடைந்து வருகிறது. பாதுகாப்புத் தளவாட ஏற்றுமதியில் சிறந்து விளங்கும் முதல் 25 நாடுகளில் இந்தியா முன்னணியில் இருக்கிறது.
கடந்த 2017-18-ம் ஆண்டு 4,682 கோடி ரூபாய் மதிப்பிலான பாதுகாப்புத் தளவாடங்களை இந்தியா ஏற்றுமதி செய்தது. இது 2022-23-ம் ஆண்டில் 15,916 கோடி ரூபாயாக அதிகரித்தது.
பாதுகாப்புத் துறையின் கீழ் செயல்படும் அனைத்து பொதுத் துறை நிறுவனங்களும் லாபத்தில் இயங்கி வருகின்றன. புதுமையான கண்டுபிடிப்புகள் மற்றும் தொழில்நுட்பத்தை பாதுகாப்பு அமைச்சகம் ஊக்குவிக்கிறது” என்று கூறியிருக்கிறார்.
