தேர்தல் அதிகாரியை தாக்கிய வழக்கில், தி.மு.க முன்னாள் மத்திய அமைச்சர் மு.க.அழகிரி, இன்று மதுரை நீதிமன்றத்தில் ஆஜரானார்.
கடந்த 2011-ம் ஆண்டு ஏப்ரல் மாதம், தமிழகத்தில் சட்ட மன்றத் தேர்தல் நடைபெற்றது. அப்போது, மதுரை மாவட்டம், மேலூர் அருகே வெள்ளலூர் அம்பலக்காரன்பட்டி வல்லடிகாரர் கோயிலுக்குள், வாக்காளர்களுக்குப் பணம் கொடுப்பதாகப் புகார் எழுந்தது.
இதனால், மேலூர் தேர்தல் அதிகாரியும், வட்டாட்சியருமான காளிமுத்து, வீடியோ கிராபருடன் அங்கு சென்று வாக்காளர்களுக்குப் பணம் கொடுக்கும் காட்சியை வீடியோ பதிவு செய்தார்.
இதற்கு தி.மு.க முன்னாள் மத்திய அமைச்சர் மு.கஅழகிரி தரப்பினர் எதிர்ப்பு தெரிவித்தனர். முதலில் அதிகாரிகளுடன் வாக்குவாதம் ஏற்பட்டது. பின்னர், மு.க.அழகிரியுடன் இருந்தவர்கள் மேலூர் தேர்தல் அதிகாரியும், வட்டாட்சியருமான காளிமுத்துவை அடித்து உதைத்தனர். இது குறித்து, வட்டாட்சியர் காளிமுத்து கீழவளவு காவல் நிலையத்தில் புகார் அளித்தார்.
அதன்பேரில், தி.மு.க முன்னாள் அமைச்சர் மு.க.அழகிரி, அப்போதைய மதுரை துணை மேயர் மன்னன் மற்றும் தி.மு.க.வைச் சேர்ந்த ரகுபதி, திருஞானம் உள்ளிட்ட 21 பேர் மீது போலீசார் வழக்குப் பதிவு செய்தனர்.
இது தொடர்பான வழக்கு விசாரணை இன்று மதுரை மாவட்ட நீதிமன்றத்தில் விசாரணைக்கு வந்தது. அப்போது, திமுக முன்னாள் மத்திய அமைச்சர் மு.க.அழகிரி உள்ளிட்டோர் நேரில் ஆஜரானார்கள்.
