அரியானா மாநிலம் குருகிராமில் ஆம்புலன்ஸ் மற்றும் தீயணைப்பு வாகனங்களுக்கு வழிவிடாமல் இடையூறு செய்பவர்களுக்கு ரூ.10 ஆயிரம் அபராதம் விதிக்கப்படும் என்று மாநகர போக்குவரத்து காவல்துறை எச்சரிக்கை விடுத்துள்ளது.
அரியானா மாநிலம் குருகிராமில் பல்வேறு மருத்துவமனைகளுக்கு உறுப்புகளை எடுத்துச் செல்லும் ஆம்புலன்ஸ்களுக்கு தனி வழியை (பசுமை வழித்தடங்களை) அம்மாநில அரசு அமைத்துள்ளது.
ஆனால் ஆம்புலன்ஸ், தீயணைப்பு வண்டிகள் உள்ளிட்ட அவசர கால வாகனங்களுக்கு வழிவிடாமல் இடையூறு செய்யப்படுவதாக குற்றச்சாட்டு எழுந்தது.
இதனையடுத்து அவசர கால வாகனங்களுக்கு வழிவிடாமல் இடையூறு செய்தால் கடும் நடவடிக்கை எடுக்கப்படும் என மாநகர போக்குவரத்து துணை ஆணையர் விரேந்தர் விஜி தெரிவித்துள்ளார்.
மோட்டார் வாகனச் சட்டப்படி அவசர கால வாகனங்களுக்கு வழிவிடாமல் இடையூறு செய்பவர்களுக்கு ரூ.10,000 அல்லது 6 மாதள் சிறை தண்டனை அல்லது இரண்டுமே விதிக்கப்படும் என அவர் எச்சரித்தார்.
மேலும் போக்குவரத்து விதிகளை மீறும் வாகனங்கள் கண்காணிப்பு கேமரா மூலம் கண்காணிக்கபட்டு ஆன்லைன் மூலம் அபராத ரசீது அனுப்பப்படும் என்றும் அவர் கூறினார்.
