பீகார் மாநிலம் லக்சிசராய் அருகே ஆட்டோ மீது லாரி மோதி கோர விபத்தில், 9 பேர் உடல் நசுங்கி சம்பவ இடத்திலேயே உயிரிழந்தனர். மேலும், 5 பேர் படுகாயமடைந்தனர்.
பீகார் மாநிலம் லக்சிசராய் – சிக்கந்த்ரா சாலையில் 14 பேருடன் ஆட்டோ ஒன்று சென்று கொண்டிருந்தது. இந்த ஆட்டோ பிஹாராவுரா (Biharaur) கிராமம் வழியாக சென்றது. அப்போது, எதிர்புறமாக அதி வேகமாக வந்த லாரி ஒன்று ஆட்டோவின் மீது மோதி விபத்துக்குள்ளானது. இதை அடுத்து, லாரி ஓட்டுநர் தப்பி ஓடினார்.
இந்த கோர விபத்தில் 9 பேர் உடல் நசுங்கி சம்பவ இடத்திலேயே பரிதாபமாக உயிரிழந்தனர். மேலும், ஐந்து பேர் படுகாயமடைந்தனர்.
இதுகுறித்து அப்பகுதியில் இருந்தவர்கள் போலீசாருக்கு தகவல் கொடுத்தனர். தகவலின் பேரில் விரைந்து வந்த போலீசார், படுகாயமடைந்தவர்களை மீட்டு அருகிலுள்ள மருத்துவமனையில் சிகிச்சைக்காக அனுமதித்தனர்.
மேலும், இறந்தவர்களின் உடல்களை கைப்பற்றி, பிரேத பரிசோதனைக்காக மருத்துவமனைக்கு அனுப்பி வைத்தனர். இந்த விபத்து குறித்து போலீசார் வழக்குப்பதிவு செய்து விசாரணை மேற்கொண்டு வருகின்றனர்.
