அதிக கட்டணம் வசூலிக்கும் தனியார் பேருந்துகளுக்ககான உரிமைத்தை ஏன் சஸ்பெண்ட் செய்யக்கூடாது என தமிழக அரசுக்கு சென்னை உயர் நீதிமன்றம் கேள்வி எழுப்பியுள்ளது.
தமிழகத்தில் செயல்படும் தனியார் ஆம்னி பேருந்துகள் அதிக கட்டணம் வசூலிக்கப்படுவதாக பயணிகளிடம் இருந்து தொடர்பு புகார் வந்தன. குறிப்பாக பண்டிகை காலங்களில் விமான கட்டணங்களுக்கு இணையாக கட்டணம் நிர்ணயம் செய்யப்படுவதாக பொதுமக்கள் குற்றம்சாட்டி வருகின்றனர்.
இந்நிலையில் அதிக கட்டணம் வசூலிக்கும் தனியார் பேருந்துகளை அடிக்கடி சோதனை நடத்தி சம்பந்தப்பட்ட நிறுவனங்களுக்கு எதிராக நடவடிக்கை எடுக்க வகை செய்யும் அரசாணையை அமல்படுத்த வேண்டும் என உத்தரவிடக் கோரி சென்னை உயர் நீதிமன்றத்தில் வழக்கு தொடரப்பட்டது.
இந்த மனு தலைமை நீதிபதி கங்காபூர்வாலா மற்றும் நீதிபதி பரத சக்கரவர்த்தி அமர்வு முன்பு விசாரணைக்கு வந்தது. அப்போது, அதிக கட்டணம் வசூல் தொடர்பாக அடிக்கடி சோதனை நடத்தப்படுவதாகவும், விதிமீறலில் ஈடுபடும் பேருந்துகளுக்கு அபராதம் விதிக்கப்படுவதாகவும் தமிழக அரசு சார்பில் தெரிவிக்கப்பட்டது.
அப்போது அதிக கட்டணம் வசூலிக்கும் தனியார் பேருந்துகளுக்கு அபராதம் விதித்தால் மட்டும் தீர்வு ஏற்படப் போவதில்லை என்றும், தனியார் பஸ்களில் அதிக கட்டணம் வசூலிக்கப்படுகிறதா என கண்காணிக்க அடிக்கடி சோதனை நடத்த வேண்டும் என நீதிபதிகள் உத்தரவிட்டனர்.
தொடர் குற்றத்தில் ஈடுபடும் தனியார் பேருந்துகளுக்கான உரிமத்தை சஸ்பெண்ட் செய்வது உள்ளிட்ட கடுமையான நடவடிக்கைகளை எடுக்க வேண்டும் என நீதிபதிகள் உத்தரவிட்டனர்.
