“திமுக சொல்வது ஒன்னு -செய்வது ஒன்னு” – வானதி சீனிவாசன் ஆவேசம்

போதைப் பொருட்கள் இல்லாத தமிழ்நாடு என்ற நிலையை மேற்கொள்ள வேண்டும் என்று வானதி சீனிவாசன் வலியுறுத்தியுள்ளார்.

இது தொடர்பாக பாஜக தேசிய மகளிர் அணி தலைவரும், கோவை தெற்கு தொகுதி பாஜக எம்எல்ஏவான வானதி சீனிவாசன் வெளியிட்டுள்ள அறிக்கையில், தமிழகத்தில் கடந்த காலம் வரை அமைதியும் ஒழுக்கமும் நிலவியது. ஆனால், 2021 -ல் திமுக ஆட்சிக்கு வந்த பிறகு போதைப்பொருள், கொள்ளை, கொடிய குற்றச் செயல்கள் பெருகிவிட்டது.

இதன் உச்சகட்டமாக, கடந்த 2022 -ம் ஆண்டு போதை பொருட்கள் இல்லாத தமிழ்நாடு எனும் திட்டத்தைத் தொடங்கி வைத்தார், முதலமைச்சர் மு.க.ஸ்டாலின். மேலும் போதை ஒழிப்பு விழிப்புணர்வு குறும்படத்தையும் வெளியிட்டார்.

ஆனால், தற்போது நடப்பது என்ன தெரியுமா? போதைப்பொருள்கள் புழக்கம் கிராமங்கள் உட்பட தமிழகத்தின் அத்தனை பகுதிகளிலும் அதிகரித்துவிட்டது.

அதற்கு மூளையாக செயல்பட்டவர் திமுக நிர்வாகி ஜாபர் சாதிக். சர்வதேச அளவிலான போதைப்பொருள் கடத்தல் கும்பலின் தலைவனாக செயல்பட்டு உள்ளார்.

போதைப் பொருளை விற்று தமிழகத்தில் ரியல் எஸ்டேட், சினிமா தயாரிப்பாளர் என பல முகங்களுடன் சுற்றி திரிந்துள்ளார் ஜாபர் சாதிக்.

சற்றுமுன் புதுக்கோட்டை மாவட்டம், மீமிசல் கிராமம் அடுத்த கடற்கரை பகுதியில் உள்ள இறால் பண்ணையில் ஹஷிஸ், கஞ்சா போன்ற போதைப்பொருட்கள் சுமார் ரூ.110 கோடி மதிப்பிலான 100 கிலோ ஹஷிஷ் மற்றும் ரூ.1.05 கோடி மதிப்பிலான 876 கிலோ கஞ்சா சுங்கத் துறையினர் பறிமுதல் செய்துள்ளனர்.

சொல்வது ஒன்னு, செய்வது ஒன்னு என மீண்டும் ஒரு முறை நிரூபித்துள்ளளது திமுக அரசு. இனி வரும் காலத்தில், போதைப்பொருட்கள் இல்லாத தமிழ்நாடு என்ற நிலையை திமுக அரசு மேற்கொள்ள வேண்டும் என தெரிவித்துள்ளார்.