2024 ஒலிம்பிக் போட்டி பிரான்ஸ் தலைநகர் பாரீசில் நடைபெறவுள்ளது. இந்த ஒலிம்பிக் போட்டிகள் ஜூலை 26 ஆம் தேதி முதல் ஆகஸ்டு 11 ஆம் தேதி வரை நடைபெறவுள்ளது.
உலகின் மிகப்பெரிய விளையாட்டு நிகழ்வன இந்த ஒலிம்பிக் போட்டியில் 200 நாடுகளைச் சேர்ந்த 10 ஆயிரத்திற்கும் மேற்பட்ட வீரர், வீராங்கனைகள் பங்கேற்கிறார்கள்.
இந்த போட்டியின் தொடக்க விழாவை செயின் நதியின் நடத்த போட்டி அமைப்பாளர்கள் ஏற்பாடு செய்து வருகிறார்கள். அதேபோல் இந்த தொடக்க விழாவின் முக்கிய அம்சமான வீரர், வீராங்கனைகளின் அணிவகுப்பு படகில் நடைபெறவுள்ளது.
இதில் ஒவ்வொரு நாட்டு வீரர், வீராங்கனைகளும் படகில் 6 கிலோமீட்டர் தூரம் ஈபிள் கோபுரம் நோக்கி பயணிக்க உள்ளனர்.
45 நிமிடங்கள் இந்த அணிவகுப்பு நடைபெற உள்ளது. ஒலிம்பிக் வரலாற்றில் தொடக்க விழா மைதானத்திற்கு வெளியே நடக்க இருப்பது இதுவே முதல் முறையாகும்.
இந்நிலையில் இந்த தொடக்க விழாவில் பங்கேற்க ரஷியா மற்றும் பெலாரஸ் நாட்டு வீரர், வீராங்கனைகளுக்கு தடை விதிக்கப்பட்டுள்ளது.
2022 ஆம் ஆண்டு பிப்ரவரி மாதம் ரஷியா, உக்ரைன் மீது போர் தொடுத்தது. 2 ஆண்டுக்கு மேலாகியும் இன்னும் குண்டு சத்தம் ஓயவில்லை. ரஷியாவுக்கு பெலாரஸ் ஆதரவாக இருந்து வருகிறது.
போர் குற்றத்துக்காக இவ்விரு நாட்டு வீரர்கள் தற்போது சர்வதேச போட்டிகளில் தங்கள் நாட்டு கொடியின் கீழ் இல்லாமல் பொதுவான நபர்கள் என்ற பெயரிலேயே விளையாட அனுமதிக்கப்படுகிறார்கள்.
இந்த விவகாரம் குறித்து லாசானேவில் நேற்று நடந்த சர்வதேச ஒலிம்பிக் கமிட்டியின் (ஐ.ஓ.சி.) செயற்குழு கூட்டத்தில் விவாதிக்கப்பட்டது.
இதில் கலாசார சிறப்புமிக்க ஒலிம்பிக் தொடக்க விழா அணிவகுப்புக்கு ரஷியா மற்றும் பெலாரஸ் நாட்டு வீரர்களை அனுமதிப்பதில்லை என்று முடிவு செய்யப்பட்டது.
