12,000 ஆண்டுகள் பழமையான, பாதுகாக்கப்பட்ட மனித மூளை தற்போது விஞ்ஞானிகளால் கண்டுப் பிடிக்கப்பட்டுள்ளது.
உலகமே நவீன மையமாகிய இன்றைய காலகட்டத்திலும், அன்றைய காலங்களின் மனிதர்கள் எப்படி வாழ்ந்திருப்பார்கள், என்னென்ன பொருட்கள் பயன்படுத்தி இருப்பார்கள் என்பதை பற்றிய ஆராய்ச்சிகள் ஓயாமல் நடைபெற்று வருகிறது.
அந்த வகையில் அக்காலத்தில் பயன்படுத்தப்பட்ட நாணயங்கள், பழங்களாக சிலைகள் அவ்வளவு ஏன் சமீபத்தில் 5 மில்லியன் ஆண்டுகள் பழமையான நட்சத்திரம் கூட கண்டுபிடக்கப்பட்டதை பார்த்தோம்.
அந்த வகையில் தற்போது 12000 ஆண்டுகள் பழமையான மனித மூளை கண்டுபிடிக்கப்பட்டுள்ளது. பழங்கால பொருட்கள் என்றால் கூட கேட்டுப்போகாமல் இருக்கும் ஆனால் மனித மூளை என்பது மக்கும் தன்மையுடையது என்ற கேள்வி அனைவருக்குள்ளும் வரும். அதற்கான விடை குறித்து தற்போது பார்ப்போம்.
உலக புகழ்பெற்ற ஆக்ஸ்போர்டு பல்கலைக்கழகத்தின் அலெக்ஸாண்ட்ரா மார்டன்-ஹேவர்ட் தலைமையிலான ஆராய்ச்சி மையம் 12,000 ஆண்டுகள் பழமையான பாதுகாக்கப்பட்ட மூளை குறித்த தகவல்களை வெளியிட்டுள்ளது.
இந்த தொல்பொருள் ஆராய்ச்சி மையத்தின் பதிவில் வியக்க வைக்கும் வகையில் பாதுகாக்கப்பட்ட 4,400-க்கும் மேற்பட்ட மனித மூளைகளை அவர்கள் அடையாளம் கண்டுள்ளனர். அவற்றில் சில மூளைகள் 12,000 ஆண்டுகள் பழமையானவை.
மிகவும் அரிதான கண்டுபிடிப்புகள் என்று கருதப்பட்ட, பாதுகாக்கப்பட்ட மூளைகள் எகிப்திய பாலைவனங்கள் முதல் ஐரோப்பிய கரி சதுப்பு நிலங்கள் வரையிலான பகுதிகளில் இருந்து ஆய்வுக்கு எடுத்துக்கொள்ளப்பட்டன.
பொதுவாகவே ஒரு மனிதனின் உடலில் இருந்து உயிர் பிரியும்போது மூளைதான் மிகவும் விரைவாக சிதைவடையும் என்று சொல்லப்படுகிறது. ஆனால் இந்த கண்டுபிடிப்பு பிரேத பரிசோதனைக்கு பின் மூளையின் விரைவான சிதைவு பற்றிய பரவலாக நிலவும் கருத்திற்கு முரணாக உள்ளது.
கண்டுபிடிக்கப்பட்ட இந்த பழங்கால மாதிரிகள் நமது பரிணாம வரலாறு மற்றும் கடந்தகால நோய்கள் பற்றிய விவரங்களை வெளிப்படுத்தும் ஆற்றலைக் கொண்டிருப்பதாக வல்லுநர்கள் நம்புகின்றனர்.
அதே நேரத்தில் உயிரிழக்கும்போது மூளைதான் விரைவாக சிதையும் என்ற கருத்திற்கு முரணாக உள்ளதால் விஞ்ஞானிகள் மத்தியில் சிறிய குழப்பத்தையும் ஏற்படுத்தியுள்ளது
கண்டறியப்பட்ட பண்டைய காலத்து மூளைகள் புதிய மற்றும் தனித்துவமான பேலியோபயாலஜிக்கல் நுண்ணறிவுகளை வழங்கும்.
இது நரம்பியல் கோளாறுகள், பண்டைய அறிவாற்றல் மற்றும் நடத்தை மற்றும் நரம்பு திசுக்களின் பரிணாமம் மற்றும் அவற்றின் செயல்பாடுகளின் வரலாற்றை நன்கு புரிந்துகொள்ள உதவும் என விஞ்ஞானிகள் தெரிவித்துள்ளனர்.
