திருப்புல்லாணி ஆதிஜெகநாத பெருமாள் கோயிலில் ரூ.1 கோடி மதிப்புள்ள 952 கிராம் தங்க நகைகள், 2400 கிராம் வெள்ளி நகைகள் மாயம்.
ராமநாதபுரம், திருப்புல்லாணி ஆதிஜெகநாத பெருமாள் கோயில் பெருமாளின் மங்களாசாசனம் பெற்ற 108 திவ்ய தேசங்களில் 96 வது திவ்ய தேசமாக உள்ளது.
இக்கோவிலில் ஸ்ரீ ராமர் சயன நிலையில் இருக்கிறார். இது இத்தலத்தின் சிறப்பம்சமாக உள்ளது. தசரதன் பிரதிஷ்டை செய்த நாகலிங்கம் இன்றும் கோயிலில் உள்ளது.
இத்தனை சிறப்பு வாய்ந்த இத்தலத்தில் 1 கோடி மதிப்புள்ள நகைகள் மாயமாகியுள்ளது பக்தர்களிடையே அதிர்ச்சியை ஏற்படுத்தியுள்ளது.
இக்கோயிலில் மூலவருக்கும், தாயாருக்கும் அணிவிக்கப்படும் பல கோடி ரூபாய் மதிப்புள்ள தங்கம், வெள்ளி நகைகளை, கோயிலில் உள்ள பாதுகாப்பு பெட்டகம் மற்றும் ராமநாதபுரம் அரண்மனையில் உள்ள அறங்காவலர் பெட்டகத்தில் வைக்கப்பட்டுள்ளன.
இந்த பெட்டகம் மற்றும் அதன் சாவி ஆகியவை சீனிவாசன் என்ற ஸ்தானிகர் வைத்து இருப்பது வழக்கம். இந்நிலையில் சில மாதங்களுக்கு முன்பு, ராமநாதபுரம் சமஸ்தான தேவஸ்தானத்தின் திவானும், நிர்வாக செயலாளருமான பழனிவேல் பாண்டியன் நகைகளை ஆய்வு செய்தார்.
நகைகள் கணக்கெடுப்பின் போது 952 கிராம் தங்க நகைகள், 2400 கிராம் வெள்ளி நகைகள் மாயமானது தெரியவந்துள்ளது. இதனையடுத்து சீனிவாசனிடம் விசாரணை நடத்தப்பட்டது. தொடர்ந்து, அவரை பழனிவேல் பாண்டியன் சஸ்பெண்ட் செய்தார்.
இச்சூழ்நிலையில், ராமநாதபுரம் மாவட்ட எஸ்.பி.,யிடம் 30 வகையான தங்க நகைகள், 16 வெள்ளி நகைகள் காணவில்லை எனவும், இவற்றின் மதிப்பு ரூ.1 கோடி என பழனிவேல் பாண்டியன் புகார் அளித்தார். இதன் அடிப்படையில், மாவட்ட குற்றப்பிரிவு போலீசார் விசாரணை நடத்தி வருகின்றனர்.
