தமிழகத்தில் 4-ஆம் வகுப்பு முதல் 9-ஆம் வகுப்பு வரை, இன்று முதல் ஏப்ரல் 21-ஆம் தேதி வரை தொடா் விடுமுறை அறிவிக்கப்பட்டுள்ளது.
தமிழகத்தில் 10, 11 மற்றும் 12ம் வகுப்பு மாணவர்களுக்கு மார்ச் 1ம் தேதி முதல் ஏப்ரல் 8ம் தேதி வரை பொதுத்தேர்வு நடைபெற்றது.
அதேசமயம் 1-ஆம் வகுப்பு முதல் 9-ஆம் வகுப்பு வரையிலான மாணவர்களுக்கு, முழு ஆண்டு தேர்வு ஏப்ரல் 18-ஆம் தேதி முதல் 30-ஆம் தேதி வரை நடத்தப்படும் என அறிவிக்கப்பட்டிருந்தது.
ஆனால், மக்களவைத் தேர்தல் ஏப்ரல் 19-ஆம் தேதி நடைபெற உள்ளதால், 1 முதல் 9ஆம் வகுப்பு மாணவர்களுக்கு, தேர்வுகளை முன்கூட்டியே நடத்தி முடிக்க திட்டமிடப்பட்டது. அதன்படி, 1-ஆம் வகுப்பு முதல் 9-ஆம் வகுப்பு வரை படிக்கும் மாணவர்களுக்கு, ஏப்ரல் 2-ஆம் தேதி முதல் 12-ஆம் தேதி வரை தேர்வுகள் நடைபெறும் என தெரிவிக்கப்பட்டது.
இதில், 1 முதல் 3-ஆம் வகுப்பு வரையிலான மாணவர்களுக்கு ஏப்ரல் 5-ஆம் தேதியுடன் தோ்வுகள் முடிவடைந்த நிலையில், கோடை விடுமுறையும் அளிக்கப்பட்டுள்ளது.
ஆனால், ரமலான் பண்டிகையின் காரணமாக, 4 முதல் 9-ஆம் வகுப்பு வரையிலான மாணவா்களுக்கு ஏப்ரல் 10-ஆம் தேதி நடைபெறவிருந்த அறிவியல் தேர்வு ஏப்ரல் 22-ஆம் தேதிக்கும், ஏப்ரல் 12-ஆம் தேதி நடைபெறவிருந்த சமூக அறிவியல் தேர்வு ஏப்ரல் 23-ஆம் தேதிக்கும் மாற்றம் செய்யப்பட்டது.
இந்நிலையில், தமிழகத்தில் 4 முதல் 9-ஆம் வகுப்பு வரையிலான மாணவா்களுக்கு, இன்று முதல் ஏப்ரல் 21-ஆம் தேதி வரை, 9 நாட்கள் தொடா் விடுமுறை அறிவிக்கப்பட்டுள்ளது. ஏப்ரல் 22, 23-ஆம் தேதிகளில் தள்ளிப்போன தேர்வுகள் நடைபெறும் என தெரிவிக்கப்பட்டுள்ளது.
