4-ஆம் கட்ட மக்களவை தேர்தலுக்கான வாக்குப்பதிவு, 10 மாநிலங்களில் உள்ள 96 தொகுதிகளில் நாளை நடைபெறவுள்ளது.
மக்களவை தேர்தல் 7 கட்டங்களாக நடைபெறும் நிலையில், கடந்த 7-ம் தேதி 3-ம் கட்ட வாக்குப்பதிவு நிறைவு பெற்றது.
இதனைத் தொடர்ந்து, 4-ம் கட்டமாக ஆந்திரா, தெலுங்கானா, ஒடிசா, மேற்கு வங்கம் உள்ளிட்ட 10 மாநிலங்களில் உள்ள 96 மக்களவை தொகுதிகளுக்கு நாளை வாக்குப்பதிவு நடைபெறுகிறது. இதில், ஆந்திராவில் உள்ள 25 தொகுதிகளுக்கும், தெலங்கானாவில் உள்ள 17 தொகுதிகளுக்கும் ஒரே கட்டமாக வாக்குப்பதிவு நடைபெறுகிறது.
மேலும், ஆந்திரா மற்றும் ஒடிசாவில் நாடாளுமன்றத் தேர்தலோடு சட்டமன்றத் தேர்தலும் நடைபெறவுள்ளது. இதில், ஆந்திராவில் உள்ள 175 சட்டப்பேரவை தொகுதிகளுக்கு ஒரே கட்டமாகவும்,ஒடிசாவில் முதற்கட்டமாக 28 சட்டப்பேரவை தொகுதிகளுக்கும் நாளை வாக்குப்பதிவு நடைபெறவுள்ளது.
4-ம் கட்ட தேர்தலை முன்னிட்டு, 10 மாநிலங்களிலும் அரசியல் தலைவர்கள் தீவிர பிரச்சாரத்தில் ஈடுபட்ட நிலையில், நேற்று மாலையுடன் பிரச்சாரம் ஓய்ந்தது. நாளை வாக்குப்பதிவு நடைபெறவுள்ளதை முன்னிட்டு, 96 தொகுதிகளிலும் பாதுகாப்பு பலப்படுத்தப்பட்டுள்ளன.
