ஸ்லோவாகிய பிரதமர் ராபர்ட் ஃபிகோ மீது துப்பாக்கிச் சூடு நடத்தப்பட்ட சம்பவம் பரபரப்பை ஏற்படுத்தியுள்ளது. இந்த தாக்குதலுக்கு பிரதமர் நரேந்திர மோடி உள்ளிட்ட சர்வதேச தலைவர்கள் கண்டனம் தெரிவித்துள்ளனர்.
ஸ்லோவாகியாவின் ஹன்ட்லோவா நகரில் அரசு நிகழ்ச்சி ஒன்றில் பங்கேற்ற அந்நாட்டு பிரதமர் ராபர்ட் ஃபிகோ, தனது ஆதரவாளர்களிடையே உரையாற்றிக் கொண்டிருந்தார். அப்போது அடையாளம் தெரியாத நபர் ஒருவர், அவர் மீது நான்கு முறை துப்பாக்கியால் சுட்டார். சரிந்து விழுந்த பிரதமர் ராபர்ட் ஃபிகோவை அவரது பாதுகாவலர்கள் மீட்டு, ஹெலிகாப்டர் மூலம் அருகிலுள்ள மருத்துவமனையில் அனுமதித்தனர். இதனைத் தொடர்ந்து, துப்பாக்கியால் சுட்ட மர்ம நபரை போலீஸார் கைது செய்தனர். மருத்துவமனையில் தீவிர சிகிச்சை அளிக்கப்பட்ட நிலையில், ராபர்ட் ஃபிகோ உயிருக்கு ஆபத்தான கட்டத்தைக் கடந்து விட்டதாக தகவல்கள் வெளியாகியுள்ளன.
இந்த துப்பாக்கிச் சூடு சம்பவத்திற்கு பிரதமர் நரேந்திர மோடி, அமெரிக்க அதிபர் ஜோ பைடன், பிரிட்டன் பிரதமர் ரிஷி சுனக், ரஷ்ய அதிபர் புதின், ஃப்ரான்ஸ் அதிபர் இம்மானுவேல் மேக்ரோன் உள்ளிட்ட பல்வேறு நாடுகளின் தலைவர்கள் கண்டனம் தெரிவித்துள்ளனர்.
இது குறித்து பிரதமர் மோடி வெளியிட்டுள்ள எக்ஸ் பதிவில், ஸ்லோவாக்கிய பிரதமர் ராபர்ட் ஃபிகோ மீது துப்பாக்கிச்சூடு நடத்தப்பட்ட செய்தியைக் கேட்டு அதிர்ச்சியடைந்ததாகவும், இந்த கோழைத்தனமான செயலை வன்மையாக கண்டிப்பதாகவும் குறிப்பிட்டுள்ளார். ராபர்ட் ஃபிகோ விரைவில் குணமடைய வேண்டும் என்றும், ஸ்லோவாக்கிய மக்களுடன் இந்தியா துணை நிற்கும் என்றும் பிரதமர் மோடி தெரிவித்துள்ளார்.
