மாஞ்சோலை எஸ்டேட்டிற்கான குத்தகைக் காலம் நிறைவடைந்த நிலையில் தேயிலைத் தோட்டத்தை அரசே ஏற்று நடத்த வேண்டும் என அமமுக பொதுச்செயலாளர் டி.டி.வி. தினகரன் வலியுறுத்தியுள்ளார்.
இது தொடர்பாக அவர் வெளியிட்டுள்ள செய்திக் குறிப்பில்.
மும்பை நிறுவனத்தின், குத்தகை காலம் முடியும் நிலையில், அங்கு பணியாற்றி வரும் தொழிலாளர்களை வெளியேற்றும் பணிகள் நடைபெற்று வருவதாக வெளியாகம் செய்தி அதிர்ச்சி அளிப்பதாக தெரிவித்துள்ளார்.
இதனால், தேயிலைத் தோட்ட தொழிலாளர்கள் வாழ்வாதாரத்திற்கு வழியின்றி சொந்த மாநிலத்திலேயே அகதிகளாகும் சூழலுக்கு தள்ளப்பட்டிருப்பது மிகுந்த வருத்தமளிப்பதாகவும் அவர் கூறியுள்ளார்.
மேலும், கூலி உயர்வு கோரி நெல்லை மாவட்ட ஆட்சியர் அலுவலகம் அருகே ஊர்வலம் சென்ற தொழிலாளர்கள் மீது, திமுக அரசின் காவல்துறை நடத்திய தடியடியில், 17 பேர் உயிரிழந்த துயரம் அரங்கேறி கால் நூற்றாண்டுகள் கடந்திருந்தாலும், தொழிலாளர்களின் வாழ்வாதாரம் துளியளவும் மேம்படவில்லை என அவர் குறிப்பிட்டுள்ளார்.
நீலகிரி மற்றும் கோவை மாவட்டங்களில் உள்ள தமிழ்நாடு தேயிலைத் தோட்ட கழகத்திற்கு சொந்தமான தேயிலைத் தோட்டங்களைப் போல மாஞ்சோலை எஸ்டேட்டையும் தமிழக அரசே ஏற்று நடத்தி நூற்றுக்கணக்கான தொழிலாளர்களின் வாழ்வாராரத்தை பாதுகாக்க வேண்டும் என்றும் தினகரன் வலியுறுத்தியுள்ளார்.
