சுதந்திர போராட்ட வீரர்கள் ஜாதி தலைவர்களாக மாற்றப்பட்டுவிட்டதாக தமிழக ஆளுநர் ஆர்.என்.ரவி வேதனை தெரிவித்துள்ளார்.
சென்னை கிண்டியில் உள்ள ஆளுநர் மாளிகையில் முதல் இந்திய சுதந்திரப் போர் பிரகடனம் என்று சொல்லப்படும், ஜம்புத்தீவு பிரகடன நினைவு நாள் மற்றும் அறியப்படாத தமிழக சுதந்திர போராட்ட வீரர்கள் பற்றிய ஆய்வுகள் நடத்தியவர்களை கௌரவிக்கும் நிகழ்வு நடைபெற்றது.
இந்த விழாவில் அறியப்படாத தமிழக சுதந்திர போராட்ட தியாகிகள் குறித்து பல்கலைக்கழக ஆராய்ச்சி மாணவர்கள் எழுதிய 89 ஆய்வு நூல்களை ஆளுநர் வெளியிட்டார். அப்போது பேசிய ஆளுநர் ஆர்.என்.ரவி, 1801-ம் ஆண்டு ஜம்புத் தீவு பிரகடனம் மூலம் ஐரோப்பியர்களை எப்படி விரட்ட வேண்டும் என மருது சகோதரர்கள் தெரிந்து வைத்திருந்ததாக கூறினார்.
ஜம்புத் தீவு பிரகடனம் மூலம் மக்களை ஒன்றிணைத்து ஐரோப்பியர்களை வெளியேற்ற மருது சகோதரர்கள் முடிவு செய்ததாகவும், அதுதான் முதல் சுதந்திரப் போராட்டம் என்றும் ஆளுநர் ஆர்.என்.ரவி தெரிவித்தார். மறைக்கப்பட்ட சுதந்திர போராட்ட வரலாற்றை வெளிக்கொண்டு வர வேண்டும் என்றும் ஆளுநர் கேட்டுக்கொண்டார்.
