சிபிஎஸ்இ பாடத்திட்டத்தில் 3 மற்றும் 6-ஆம் வகுப்பைத் தவிர பிற வகுப்புகளுக்கான பாடத்திட்டத்தில் எந்த மாற்றமுமில்லை என மத்திய இடைநிலைக் கல்வி வாரியம் தெரிவித்துள்ளது.
இதுதொடர்பாக சிபிஎஸ்இ சார்பில் வெளியிடப்பட்டுள்ள செய்திக் குறிப்பில், பள்ளிகள் முந்தைய கல்வியாண்டுக்கான பாடத்திட்டத்தையே அடுத்த கல்வியாண்டிலும் பின்பற்றலாம் என தெரிவிக்கப்பட்டுள்ளது.
3 மற்றும் 6-ஆம் வகுப்பைத் தவிர பிற வகுப்புகளுக்கான பாடத்திட்டத்தில் எந்த மாற்றமுமில்லை என்றும் சிபிஎஸ்இ நிர்வாகம் கூறியுள்ளது.
பள்ளி நிர்வாகம் இடையே நிலவிய சந்தேகங்களுக்குத் தீர்வு அளிக்கும் விதமாகவும், தெளிவான அறிவுறுத்தலைப் பிறப்பிக்கவும் இந்த அறிவிக்கையை வெளியிடுவதாக மத்திய இடைநிலைக் கல்வி வாரியம் கூறியுள்ளது.
தேசிய கல்வி ஆராய்ச்சி மற்றும் பயிற்சி கவுன்சில் அறிவுறுத்தலின்படி, 3 மற்றும் 6-ஆம் வகுப்புகளுக்கு மட்டும் புதிய பாடத்திட்டங்களைப் பின்பற்றுமாறு சிபிஎஸ்இ பள்ளிகளுக்கு கடந்த மார்ச் மாதமே மத்திய இடைநிலைக் கல்வி வாரியம் சுற்றறிக்கை அனுப்பியிருந்தது குறிப்பிடத்தக்கது.
