வேள்பாரி நாவல் காட்சிகளை அனுமதியின்றி பயன்படுத்துபவர்கள் மீது சட்ட நடவடிக்கை எடுக்கப்படும் என இயக்குநர் ஷங்கர் கடுமையாக எச்சரித்துள்ளார்.
இயக்குநர் ஷங்கர், எழுத்தாளரும், எம்.பி.யுமான சு.வெங்கடேசன் எழுதிய ‘வீரயுக நாயகன் வேள்பாரி’ நாவலை திரைப்படமாக்க திட்டமிட்டுள்ளார். இதற்கான முதல்கட்ட எழுத்துப் பணிகளும் தொடங்கியுள்ளதாக தெரிகிறது. இந்த நிலையில் தன் எக்ஸ் தள பக்கத்தில் ஷங்கர் பதிவொன்றை வெளியிட்டுள்ளார்.
அதில், சமீபத்தில் வெளியான டிரெய்லரில் வேள்பாரி நாவலின் மிக முக்கியமான பகுதியை பார்த்ததாகவும், நாவலின் காப்புரிமையை பெற்றவனாக உண்மையிலேயே வேதனையாக இருப்பதாகவும் பதிவிட்டுள்ளார்.
மேலும், இனி நாவலிலிருந்து காட்சிகளை எடுத்தால் சட்ட நடவடிக்கையை எதிர்கொள்ள தயாராக இருங்கள் எனவும் ஷங்கர் தனது பதிவில் எச்சரித்துள்ளார். இதனையடுத்து ஷங்கர் குறிப்பிட்ட அந்த டிரெய்லர், தேவராவா? சூர்யாவின் கங்குவாவா? அல்லது ரஜினியின் வேட்டையன் டிரெய்லரா என ரசிகர்கள் கேள்வி எழுப்பி வருகின்றனர்.
