ஹெலேன் புயலால் அமெரிக்காவில் மிகப்பெரிய பேரழிவு ஏற்பட்டுள்ளதாக அதிபர் ஜோ பைடன் கவலை தெரிவித்துள்ளார்.
அமெரிக்காவில் நிலைக்கொண்டிருந்த ஹெலேன் புயல் புளோரிடா அருகே கரையை கடந்தது. புயல் கரையை கடந்தபோது புளோரிடாவில் கனமழை கொட்டி தீர்த்ததுடன், மணிக்கு 225 கிலோ மீட்டர் வேகத்தில் சூறாவளி காற்று வீசியது.
ஹெலேன் புயலால் பல வீடுகள் சேதமடைந்துள்ள நிலையில், மழை மற்றும் வெள்ளத்தில் சிக்கி இதுவரை 56 பேர் உயிரிழந்துள்ளதாக அரசு தரப்பில் தெரிவிக்கப்பட்டுள்ளது.
புளோரிடா, ஜார்ஜியா மற்றும் கரோலினா பகுதிகளில் மின்சாரம் இன்றி 30 லட்சத்திற்கும் மேற்பட்ட வீடுகள் இருளில் மூழ்கிய நிலையில், வர்த்தக நிறுவனங்களும் பாதிக்கப்பட்டுள்ளதாக கூறப்பட்டுள்ளது.
புளோரிடாவில் உள்ள கல்வி நிறுவனங்களில் விடுமுறை அறிவிக்கப்பட்டுள்ள நிலையில், விமான நிலையங்கள் மூடப்பட்டுள்ளது.
வெள்ளப்பெருக்கு காரணமாக 10 பேர் நிவாரண முகாம்களில் தங்க வைக்கப்பட்டுள்ளதாக அரசு அதிகாரிகள் தெரிவித்துள்ளனர். இதனிடையே, எக்ஸ் பக்கத்தில் அதிபர் ஜோ பைடன் வெளியிட்டுள்ள பதிவில், ஹெலேன் புயலால் அமெரிக்காவில் மிகப்பெரிய பேரழிவு ஏற்பட்டுள்ளதாக தெரிவித்துள்ளார்.
