தமிழ்நாடு அரசு ஊழியர்கள் மற்றும் ஆசிரியர்களுக்கான அகவிலைப்படியை 3 சதவீதம் உயர்த்தி முதலமைச்சர் மு.க.ஸ்டாலின் உத்தரவிட்டுள்ளார்.
இதுதொடர்பாக தமிழக அரசு வெளியிட்டுள்ள செய்திக்குறிப்பில், மத்திய அரசு பணியாளர்களை போலவே, மாநில அரசு ஊழியர்கள் மற்றும் ஆசிரியர்களுக்கும் அகவிலைப்படி 3 சதவீதம் உயர்த்தப்பட்டுள்ளதாக தெரிவிக்கப்பட்டுள்ளது.
அதன்படி, 50 சதவீதமாக உள்ள அகவிலைப்படி, ஜூலை 1-ஆம் தேதி முதல் 53 சதவீதமாக உயர்த்தி வழங்கப்படும் எனவும், இந்த அகவிலைப்படி உயர்வால், சுமார் 16 லட்சம் அரசு அலுவலர்கள், ஆசிரியர்கள், ஓய்வூதியதாரர்கள் மற்றும் குடும்ப ஓய்வூதியதாரர்கள் பயன்பெறுவார்கள் எனவும் குறிப்பிடப்பட்டுள்ளது.
இந்த அறிவிப்பால், ஆண்டு ஒன்றுக்கு அரசுக்கு ஆயிரத்து 931 கோடி ரூபாய் கூடுதல் செலவினம் ஏற்படும் எனவும் தமிழ்நாடு அரசின் செய்திக்குறிப்பு தெரிவிக்கிறது.
