தீபாவளி பண்டிகையை ஒட்டி இந்திய குடியரசு தலைவர் திரௌபதி முர்மு நாட்டு மக்களுக்கு வாழ்த்து தெரிவித்துள்ளார்.
நாடு முழுவதும் இன்று தீபாவளி பண்டிகை வெகு விமரிசையாக கொண்டாடப்பட்டு வருகிறது. இந்நிலையில், நாட்டு மக்களுக்கு தீபாவளி வாழ்த்து தெரிவித்து குடியரசு தலைவர் திரௌபதி முர்மு செய்திக் குறிப்பு ஒன்றை வெளியிட்டுள்ளார்.
அதில், தீபாவளி மகிழ்ச்சி மற்றும் உற்சாகத்தின் பண்டிகை என குறிப்பிட்டுள்ள அவர், அறியாமைக்கு எதிராக அறிவும், தீமைக்கு எதிராக நன்மையும் வெற்றி பெற்றதைக் குறிக்கும் விழா தீபாவளி எனவும் தெரிவித்துள்ளார்.
இந்தியா மற்றும் வெளிநாடுகளில் உள்ள பல்வேறு சமூகத்தினர் இந்த பண்டிகையை ஆர்வத்துடன் கொண்டாடுவதாக தெரிவித்துள்ள குடியரசு தலைவர் திரௌபதி முர்மு, இப்பண்டிகை பிரகாசமான எதிர்காலத்திற்கான நம்பிக்கையை தூண்டுவதாகவும் கூறியுள்ளார். மேலும், மாசு இல்லாத தீபாவளியை அனைவரும் கொண்டாட வேண்டும் எனவும் அவர் நாட்டு மக்களுக்கு அறிவுறுத்தியுள்ளார்.
