சேலத்தில், பட்டாசு வெடிப்பது தொடர்பாக ஏற்பட்ட தகராறில், இளம் பெண்ணை மதுபோதையில் ஐந்து இளைஞர்கள் சேர்ந்து சரமாரியாக தாக்கிய சம்பவம் அதிர்ச்சியை ஏற்படுத்தியுள்ளது.
சேலம் பெரமனூர், நாராயண பிள்ளை தெருவை சேர்ந்த ஞானேஸ்வரி – பிரகாஷ் தம்பதியின் நான்கு வயது சிறுவன் வீட்டின் முன்பாக பட்டாசு வெடித்துள்ளான். அப்போது, மதுபோதையில் வந்த 5 இளைஞர்கள், பட்டாசு வெடிக்கக்கூடாது என கூறி சிறுவனின் தாய் ஞானேஸ்வரியிடம் தகராறு செய்துள்ளனர்.
இதனை வீடியோவாக ஞானேஸ்வரி எடுத்ததால், இளைஞர்கள் ஆத்திரமடைந்து, அவரை சரமாரியாக தாக்கி, ஆடைகளையும் கிழித்துள்ளனர். இதில் படுகாயமடைந்த ஞானேஸ்வரி சேலம் அரசு மருத்துவமனையில் சிகிச்சை பெற்று வருகிறார்.
இதுகுறித்து பள்ளப்பட்டி காவல் நிலையத்தில் புகார் கொடுத்தும் இளைஞர்கள் மீது எந்த நடவடிக்கையும் எடுக்கவில்லை என குற்றச்சாட்டு எழுந்துள்ளது.
