நெல்லை மாவட்டம் மேடப்பாக்கத்தில் 17 வயது சிறுவன் மீது கொலை வெறி தாக்குதல் நடத்தப்பட்ட விவகாரத்தில், தமிழ் ஜனம் செய்தி எதிரொலியாக 2 பேர் கைது செய்யப்பட்டனர்.
நெல்லை மாவட்டம் மேடப்பாக்கத்தில் மனோஜ் குமார் என்ற சிறுவன் சாலையில் சென்றுக்கொண்டிருந்தபோது, கார் ஒன்று வேகமாக மோதுவது போல் வந்துள்ளது. இதனை சிறுவன் தட்டிக்கேட்டுள்ளார். இதனால் ஆத்திரமடைந்த காரில் வந்த நபர்கள், சிறுவனின் வீட்டிற்கு சென்று மது மற்றும் கஞ்சா போதையில் அரிவாள், பீர் பாட்டில் உள்ளிட்டவற்றை கொண்டு கொலைவெறி தாக்குதல் நடத்தியுள்ளனர். இது குறித்து புகார் அளித்தும் போலீசார் நடவடிக்கை எடுக்கவில்லை என கூறப்படுகிறது.
இதனால், ஆத்திமடைந்த உறவினர்கள் சாலைமறியல் போராட்டத்தில் ஈடுபட்டனர். மேலும், தங்களுக்கு பாதுகாப்பான சூழல் இல்லை எனக்கூறி, மேடப்பாக்கம் பகுதி மக்கள் அருகில் உள்ள மலையில் குடியேற முயன்றனர். அவர்களுடன் அதிகாரிகள் பேச்சுவார்த்தை நடத்தினா்.
இந்நிலையில், சிறுவன் மீது நடத்தப்பட்ட தாக்குதல் தொடர்பாக, திருமலை கொழுந்துபுரத்தை சோ்ந்த முத்துமாலை,லட்சுமணன் என்ற 2 பேரை போலீசார் கைது செய்துள்ளனர்.வழக்கில் தொடர்புடைய மேலும் சிலரை பாளையங்கோட்டை தாலுகா போலீசார் தேடி வருகின்றனர். தாக்குதல் நடத்தியவர்கள் மீது வன்கொடுமை தடுப்புச் சட்டம், சிறார் நீதி சட்டம், கொலை முயற்சி உள்ளிட்ட பல பிரிவுகளில் வழக்குப்பதிவு செய்யப்பட்டுள்ளது.
