பொது வாழ்விலிருந்து ஓய்வு பெறுவது தொடர்பாக தேசியவாத காங்கிரஸ் தலைவர் சரத்பவார் சூசகமாக தெரிவித்தார்.
மகாராஷ்டிர சட்டப் பேரவைத் தேர்தலையொட்டி, தனது சொந்த ஊரான பாராமதியில் தேசியவாத காங்கிரஸ் வேட்பாளர்களை ஆதரித்து சரத் பவார் பிரசாரம் மேற்கொண்டார்.
அப்போது தாம் மாநிலங்களவை உறுப்பினர் தவிர வேறு எந்தப் பதவியிலும் இல்லை என்றும், இன்னும் ஒன்றரை ஆண்டுகள் மட்டுமே தமக்குப் பதவிக்காலம் இருப்பதாகவும் அவர் தெரிவித்தார்.
அதன்பின்னர், மீண்டும் மாநிலங்களவைத் தேர்தலில் போட்டியிடுவது தொடர்பாக சிந்திக்க வேண்டும் என்று கூறிய சரத் பவார், தாம் இதுவரை போட்டியிட்ட 14 தேர்தல்களிலும் வெற்றி பெற்றதை நினைவுகூர்ந்தார். இளம் தலைமுறைக்கு வழிவிடுவது அவசியம் என்றும், அதற்காக சமூக சேவையிலிருந்து தாம் ஓய்வுபெறுவதாக அர்த்தமில்லை என்றும் சரத் பவார் கூறினார்.
