அமெரிக்க அதிபர் தேர்தலில் அமோக வெற்றி – யார் இந்த ட்ரம்ப்? – சிறப்பு கட்டுரை!

பன்முகத் தன்மை கொண்ட அமெரிக்காவின் முன்னாள் அதிபர் டொனால்ட் ட்ரம்ப், மீண்டும் அதிபராக தேர்வு செய்யப்பட்டுள்ளார். அமெரிக்க அரசியலில் ஆழமான தாக்கத்தை ஏற்படுத்தியுள்ள டொனால்ட் ட்ரம்ப் பற்றி ஒரு செய்தி தொகுப்பு.

ரியல் எஸ்டேட் முதலாளி, டிவியில் ரியாலிட்டி ஷோ நட்சத்திரம், ராணுவ கல்வியாளர், எழுத்தாளர், வணிக முதலீட்டு ஆலோசகர், அமெரிக்காவின் மிகவும் சக்தி வாய்ந்த அரசியல்வாதி என பன்முகமாக விளங்கும் டொனால்ட் ட்ரம்ப், தனது துணிச்சலான முடிவுகள் மற்றும் நடவடிக்கைகளுக்காக பெரும்பாலான அமெரிக்க மக்களால் பாராட்டப்படுகிறார்.

அமெரிக்காவின் நியூயார்க் நகரத்தில் உள்ள குயின்ஸ் பகுதியில், ஜமைக்கா எஸ்டேட்ஸ் என்று அழைக்கப்படும் ஒரு உயர்மட்ட இடத்தில், 1946ம் ஆண்டு ஜூன் 14 ஆம் தேதி, ஒரு பணக்கார ரியல் எஸ்டேட் தொழில் அதிபரான, ஃபிரடெரிக் கிறிஸ்ட் டிரம்ப் மற்றும் ஸ்காட்லாந்தின் மேரி அன்னே மேக்லியோட் ஆகியோருக்குப் பிறந்த ஐந்து குழந்தைகளில் நான்காவது குழந்தையாக டொனால்ட் ட்ரம்ப் பிறந்தார்.

இரண்டாம் உலகப் போருக்குப் பின் அமெரிக்காவின் கட்டுமான வளர்ச்சியில் டொனால்ட் ட்ரம்பின் தந்தையின் பங்களிப்பு மிக முக்கியமானது.

13 வயதில் நியூயார்க்கில் உள்ள நியூயார்க் ராணுவ அகாடமியில் ட்ரம்ப் சேர்ந்தார். தொடர்ந்து, 1968 ஆம் ஆண்டு , பென்சில்வேனியா பல்கலைக்கழகத்தின் வார்டன் ஸ்கூல் ஆஃப் ஃபைனான்ஸ் அண்ட் காமர்ஸில் பொருளாதாரத்தில் இளங்கலைப் பட்டம் பெற்றார்.

படிப்பை முடித்தவுடன், தனது தந்தையின் வணிகத்தில் முழுநேரமாக தன்னை இணைத்து கொண்டார். நியூயார்க் நகரத்திற்கு வெளியே வர்ஜீனியா, ஓஹியோ, நெவாடா மற்றும் கலிபோர்னியா போன்ற இடங்களில் சொத்துக்களை வாங்கி வணிகத்தைத் தொடர்ந்தார். மன்ஹாட்டனில் உள்ள பழைய கட்டிடங்களை, மிக உயரமான ஆடம்பர கட்டிடங்களாக ட்ரம்ப் மாற்றி காட்டினார்.

தனது நிர்வாக திறமையால் நியூயார்க்கில் உள்ள கிராண்ட் ஹையத் ஹோட்டல் மற்றும் டிரம்ப் டவரை பிரமாண்டமாக எழுப்பினார் டொனால்ட் ட்ரம்ப்.

தொடர் வணிக வெற்றியின் பாதையில் டிரம்ப், சூதாட்ட வணிகத்திலும் தனது வணிகத்தை
விரிவுபடுத்தினார். டிரம்ப் பிளாசா மற்றும் டிரம்ப் கோட்டை போன்ற அவரது முயற்சிகள், நிதி சிக்கல்களுக்கு இடையிலேயும், வாழ்க்கையை விட பெரிய தொழிலதிபர் என்ற அவரது பிம்பத்தை உருவாக்கியது. 1990ம் ஆண்டில், டிரம்ப் தாஜ்மஹாலை கிட்டத்தட்ட 1 பில்லியன் அமெரிக்க டாலர் செலவில் கட்டி, அதை “உலகின் எட்டாவது அதிசயம்” என்று குறிப்பிட்டார்.

வேக வேகமாக வளர்ந்து வந்த ட்ரம்பின் நிறுவனங்கள் 2000 ஆண்டில் இருந்து பல முறை திவால்நிலையை அறிவித்தன.

தி ஆர்ட் ஆஃப் தி டீல் உட்பட, பேய் எழுத்தாளர்களுடன் பணிபுரிந்த டிரம்ப், வணிக ஆலோசனை நூல்களை வெளியிட்டார்.1996 ஆம் ஆண்டு முதல் 2015 ஆம் ஆண்டு வரை, மிஸ் யுஎஸ்ஏ, மிஸ் டீன் யுஎஸ்ஏ மற்றும் மிஸ் யுனிவர்ஸ் அழகுப் போட்டிகளின் உரிமையாளராகவும் ட்ரம்ப் இருந்தார்.

2004 ஆம் ஆண்டு முதல் 2015 ஆம் ஆண்டு வரை என்பிசியில் ஒளிபரப்பான பிரபல வணிக தலைவர்களுக்கான ரியாலிட்டி ஷோவில் ட்ரம்ப் தொகுப்பாளராக, நெறியாளராக இருந்தார். இதன் மூலம் தன்னை ஒரு வெற்றிகரமான மற்றும் கவர்ச்சியான தொழிலதிபர் என்ற பிம்பத்தை மீண்டும் அமெரிக்க மக்களிடம் ட்ரம்ப் உறுதிப்படுத்தினார்.

பரபரப்பான கொந்தளிப்பான வணிக வாழ்க்கையின் தோல்வியின் போதும், டொனால்ட் டிரம்ப் தன்னை வெற்றியின் அடையாளமாக நிலைநிறுத்திக் கொண்டார்.

2015 ஆம் ஆண்டில் குடியரசுக் கட்சியின் அதிபர் வேட்பாளருக்கான வேட்புமனுவை ட்ரம்ப் அறிவித்து, அமெரிக்க அரசியல் அரங்கில் அதிர்ச்சி ஏற்படுத்தினார்.

மனதில் பட்டதை அப்படியே பொதுவெளியில் பேசிய டிரம்ப், மற்ற வேட்பாளர்களையும் ஊடகங்களையும் சரமாரியாக குற்றம் சாட்டினார். அமெரிக்க-மெக்சிகோ எல்லையில் சுவர் கட்டுவதாக அவர் அளித்த வாக்குறுதியும், குடியேற்றம் தொடர்பான கடுமையான நிலைப்பாடும் ட்ரம்பின் தேர்தல் பிரச்சாரத்தின் மையக் கருப்பொருளாக இருந்தன.

2016ம் ஆண்டு நவம்பரில் அமெரிக்க வரலாற்றில் மிகவும் அதிர்ச்சியூட்டும் அரசியல் எழுச்சியாக ஜனநாயகக் கட்சியின் வேட்பாளர் ஹிலாரி கிளிண்டனைத் தோற்கடித்தார். ட்ரம்பின் தேர்தல் வெற்றி, முக்கிய ஸ்விங் மாநிலங்களில் கிடைத்த வெற்றிகளால் கிட்டியது.

கணிக்க முடியாத வெளியுறவுக் கொள்கையைப் பின்பற்றிய முன்னாள் அதிபர் ட்ரம்ப், பாரிஸ் காலநிலை ஒப்பந்தம் மற்றும் ஈரான் அணுசக்தி ஒப்பந்தம் உட்பட பல சர்வதேச ஒப்பந்தங்களில் இருந்து அமெரிக்காவை விலக வைத்தார். அதே நேரத்தில் சீனாவுக்கு எதிராக உறுதியான நிலைப்பாட்டை எடுத்தார். உள்நாட்டு வரிகளைக் குறைத்தார். மேலும் அமெரிக்க நீதித்துறையைச் சீரமைத்தார் என்றாலும், 2020 இல் COVID தொற்றுநோய் நெருக்கடியை டிரம்ப் கையாண்டது கடும் விமர்சனத்தைப் பெற்றது.

2019ம் ஆண்டு டிசம்பரில், தனது அதிகாரத்தை துஷ்பிரயோகம் செய்ததாக குற்றம் சாட்டப்பட்டு, பிரதிநிதிகள் சபையால் பதவி நீக்கம் செய்யப்பட்ட மூன்றாவது அமெரிக்க அதிபரான ட்ரம்ப், தனது பதவிக்காலம் முடிவடைவதற்கு 7 நாட்களுக்கு முன், 2021ம் ஆண்டு ஜனவரி 13 ஆம் தேதி அமெரிக்க பிரதிநிதிகள் சபையால் இரண்டாவது முறையாக பதவி நீக்கம் செய்யப்பட்டார்.

இரண்டு முறை பதவி நீக்கம் செய்யப்பட்ட ஒரே அமெரிக்க அதிபர் என்ற பெருமையும் டொனால்ட் டிரம்புக்கு உண்டு.

கடந்த அமெரிக்க அதிபர் தேர்தலில், 74 மில்லியன் வாக்குகளைப் பெற்றிருந்தாலும், தன்னை எதிர்த்து போட்டியிட்ட ஜோ பைடனிடம் ஏழு மில்லியனுக்கும் அதிகமான வாக்குகள் வித்தியாசத்தில் தோல்வியடைந்தார் டொனால்ட் ட்ரம்ப்.