சென்னை திருவல்லிக்கேணியில் பாரத ஸ்டேட் வங்கி கிளையில் நடந்த கொள்ளை முயற்சி சம்பவம் தொடர்பாக போலீசார் தீவிரமாக விசாரணை நடத்தி வருகின்றனர்.
திருவல்லிக்கேணி காவல் நிலையம் எதிரே செயல்படும் பாரத ஸ்டேட் வங்கி கிளையின் பின்புற வாயிலில் உள்ள பூட்டை உடைத்து, மர்ம நபர் நுழைந்துள்ளார். பின்னர், இரும்பு ஆயுதத்தை கொண்டு ஸ்ட்ராங் ரூமை உடைக்க முயற்சித்துள்ளார். இதில் தோல்வியடைந்த அந்த நபர், ஏமாற்றத்துடன் தப்பிச் சென்றுள்ளார்.
வங்கியை திறக்க வந்த பணியாளர்கள், பின்பக்க கதவு உடைக்கப்பட்டு இருப்பதை கண்டு போலீசாருக்கு தகவல் கொடுத்தனர். இதையடுத்து மோப்ப நாய் மற்றும் கைரேகை நிபுணர்களை வரவழைத்து போலீசார் விசாரணை மேற்கொண்டனர்.
கடந்த புதன்கிழமை வங்கியின் அருகில் இருக்கக்கூடிய நிறுவனத்திலும் கொள்ளை முயற்சி அரங்கேறியது. பணம் ஏதும் கொள்ளை போகாததால் புகாரின் மீது எவ்வித நடவடிக்கையும் எடுக்காமல் போலீசார் மெத்தன போக்கில் இருந்ததாகக் கூறப்படுகிறது.
தற்போது இரு கொள்ளை முயற்சி சம்பவங்களிலும் ஈடுபட்டது ஒரே நபரா என்ற கோணத்தில் போலீசார் விசாரணை மேற்கொண்டு வருகின்றனர்.
