ஈரோடு குழந்தை விற்பனை விவகாரம் – மேலும் ஒருவர் கைது!

ஈரோட்டில் பச்சிளம் குழந்தை விற்பனை செய்யப்பட்ட விவகாரத்தில் 9 பேர் கைது செய்யப்பட்ட நிலையில் தலைமறைவாக இருந்த மேலும் ஒருவரை போலீசார் கைது செய்தனர்.

தஞ்சையை சேர்ந்த நித்யா, கணவருடன் ஏற்பட்ட கருத்து வேறுபாடு காரணமாக தனது குழந்தையை கணவருடன் விட்டுவிட்டு தனியாக வசித்துவந்தார். இந்நிலையில், நித்யாவுக்கு சந்தோஷ்குமார் என்பருடன் தொடர்பு ஏற்பட்ட நிலையில், ஈரோடு அரசு மருத்துவமனையில் குழந்தை பிறந்துள்ளது.

இதனையடுத்து குழந்தையை விற்பனை செய்ய இருவரும் முடிவு செய்த நிலையில் செல்வி, ராதா, ரேவதி, சித்திக்கா பானு ஆகிய இடைத்தரகர்கள் மூலமாக குழந்தையை நாகர்கோவிலை சேர்ந்த தம்பதிக்கு விற்பனை செய்துள்ளனர். இதுதொடர்பாக புகார் தெரிவிக்கப்பட்ட நிலையில், குழந்தையின் தாய், தந்தை உள்பட 9 பேரை போலீசார் கைது செய்தனர்.

இந்த விவகாரத்தில் தலைமறைவாக இருந்துவந்த ரேவதியின் கணவர் கணேஷனையும் காவல்துறையினர் கைது செய்து விசாரணை மேற்கொண்டு வருகின்றனர்.