மணப்பாறை தனியார் பள்ளியில் 4ஆம் வகுப்பு மாணவிக்கு பாலியல் தொல்லை அளிக்கப்பட்டதாக போராட்டம் நடைபெற்ற நிலையில், பள்ளியின் தாளாளர், அறங்காவலர் உள்ளிட்ட 4 பேர் கைது செய்யப்பட்டனர்.
திருச்சி மாவட்டம், மணப்பாறை அருகே உள்ள மணப்பாறைபட்டி சாலையில் சிபிஎஸ்இ பள்ளி செயல்பட்டு வருகிறது. இங்கு 4ஆம் வகுப்பு பயிலும் மாணவிக்கு பள்ளியின் அறங்காவலரும், தாளாளரின் கணவருமான வசந்தகுமார் என்பவர் பாலியல் தொல்லை அளித்ததாக கூறப்படுகிறது. இது குறித்து அறிந்த பெற்றோரும், உறவினர்களும் பள்ளிக்கு சென்று வசந்தகுமாரை கடுமையாக தாக்கினர். இதில் காயமடைந்த அவரை போலீசார் மீட்டு, மணப்பாறை அரசு மருத்துவமனைக்கு அழைத்து சென்றனர்.
இதனிடையே, பாலியல் தொல்லை அளித்த அறங்காவலர் மற்றும் பள்ளி நிர்வாகிகள் மீது கடும் நடவடிக்கை எடுக்க வலியுறுத்தி பொதுமக்கள் போராட்டத்தில் ஈடுபட்டனர்.
மேலும், பள்ளிக்குள் புகுந்து அலுவலகத்தையும் அவர்கள் அடித்து நொறுக்கினர். வளாகத்தில் நிறுத்தி வைக்கப்பட்டிருந்த கார் கண்ணாடியை உடைத்து கவிழ்த்தனர்.
இதனை தொடர்ந்து, பள்ளி தாளாளர், முதல்வர், நிர்வாகிகள் உள்ளிட்டவர்களை கைது செய்ய வலியுறுத்தி திருச்சி – திண்டுக்கல் தேசிய நெடுஞ்சாலையில் பொதுமக்கள் மறியல் போராட்டத்தில் ஈடுபட்டனர். போராட்டத்தில் ஈடுபட்டவர்களுடன் திருச்சி எஸ்பி செல்வ நாகரத்தினம் பேச்சுவார்த்தை நடத்திய நிலையில், அறங்காவலர் வசந்தகுமார், தாளாளர் சுதா உள்ளிட்ட 4 பேர் கைது செய்யப்பட்டனர். இந்நிலையில், தலைமறைவாக தலைமை ஆசிரியை விஜயலட்சுமி காவல் நிலையத்தில் சரணடைந்தார். இதனை தொடர்ந்து கைதான 5 பேர் மீதும் போக்சோ சட்டத்தின் கீழ் போலீசார் வழக்குப்பதிவு செய்து விசாரணை நடத்தி வருகின்றனர்.
பின்னர் செய்தியாளர்களிடம் பேசிய திருச்சி எஸ்பி செல்வ நாகரத்தினம், பள்ளி மாணவிகளுக்கு பாலியல் தொல்லை அளிக்கப்படுவதை தடுக்க அனைத்து பள்ளிகளிலும் விழிப்புணர்வு ஏற்படுத்த முயற்சிகள் மேற்கொள்ளப்படும் என கூறினார். மேலும், பள்ளியின் சிசிடிவி காட்சிகளை ஆய்வு செய்து வருவதாகவும் அவர் தெரிவித்தார்.
இதனை தொடர்ந்து பேசிய மாணவியின் உறவினர்கள்,
பாலியல் புகாருக்கு உள்ளான தனியார் பள்ளியை மூட மாவட்ட ஆட்சியர் நடவடிக்கை எடுக்க வேண்டும் என வலியுறுத்தியுள்ளனர். மாணவிகளின் பாதுகாப்பிற்காக அனைத்து தனியார் பள்ளிகளிலும் 2 பெண் காவலர்களை பணியமர்த்த வேண்டும் எனவும் கோரிக்கை விடுத்துள்ளனர்.
