கட்சி அலுவலகம் திறப்பு, ஈஷாவில் நடக்கும் மகா சிவராத்திரி விழா ஆகியவற்றில் கலந்து கொள்வதற்காக மத்திய உள்துறை அமைச்சர் அமித்ஷா இன்று கோவை வருகிறார்.
கோவை அவிநாசி சாலை, பீளமேடு பகுதியில், கோவை மாநகர் மாவட்ட பாஜக கட்சி அலுவலகத்துக்கு புதிய கட்டடம் கட்டப்பட்டுள்ளது. இக்கட்டடத்தின் திறப்பு விழா நாளை காலை நடைபெறுகிறது. இந்நிகழ்வில், மத்திய உள்துறை அமைச்சர் அமித் ஷா கலந்து கொண்டு புதிய அலுவலகக் கட்டடத்தை திறந்து வைக்கிறார்.
மேலும், கோவையில் இருந்தபடியே ராமநாதபுரம், திருநெல்வேலி உள்ளிட்ட 5 மாவட்டங்களில் கட்டப்பட்டுள்ள புதிய கட்சி அலுவலக கட்டடங்களையும் காணொலி மூலம் திறந்து வைக்கிறார்.
அன்றைய தினம் மாலை கோவை ஈஷா யோகா மைய வளாகத்தில், நடைபெறும் மகா சிவராத்திரி விழாவில் சிறப்பு விருந்தினராக, மத்திய உள்துறை அமைச்சர் அமித்ஷா கலந்து கொள்கிறார்.
இந்நிகழ்ச்சிகளில் பங்கேற்பதற்காக மத்திய அமைச்சர் அமித்ஷா, இன்று மாலை டெல்லியில் இருந்து தனி விமானம் மூலம் கோவை பீளமேட்டில் உள்ள சர்வதேச விமான நிலையத்துக்கு வருகிறார். இதையொட்டி கோவையில் பாதுகாப்பு பலப்படுத்தப்பட்டுள்ளது.
