விபத்துக்குள்ளாகும் விமானம் மற்றும் ஹெலிகாப்டர்களில் இருந்து கைப்பற்றப்படும் கருப்புப் பெட்டியில் என்ன இருக்கும் என்பதை தற்போது பார்க்கலாம்.
கருப்புப் பெட்டி என்பது விமான விபத்துகள் குறித்த உண்மைகளைக் கண்டறிய விமானங்களில் வைக்கப்பட்டுள்ள மின்னணு சாதனமாகும். டேவிட் வாரன் என்னும் ஆஸ்திரேலிய அறிஞர் 1954ஆம் ஆண்டு கருப்புப் பெட்டியைக் கண்டுபிடித்தார்.
ஆரஞ்சு அல்லது மஞ்சள் நிறத்தில் இருக்கும், இந்த கருப்புப் பெட்டி, தீ, நீர் அழுத்தம் மற்றும் அதிவேக விபத்துக்களைத் தாங்கும் வகையில் எஃகு அல்லது டைட்டானியம் போன்றவற்றால் வடிவமைக்கப்படுகிறது.
இந்த கருப்புப் பெட்டியில் காக்பிட் குரல் பதிவு கருவி, விமானத் தரவு பதிவு கருவி ஆகிய 2 முக்கிய பதிவு கருவிகள் உள்ளன. விமானிகளின் குரல்கள், காக்பிட் ஒலிகள் மற்றும் வானொலி தகவல்தொடர்புகளை காக்பிட் குரல் பதிவு கருவி பதிவு செய்து கொள்ளும்.
விமானத்தின் உயரம், வேகம், விமானப் பாதை, ஆட்டோ பைலட் நிலை போன்ற 80க்கும் மேற்பட்ட தகவல்களை விமானத் தரவு பதிவு கருவி பதிவு செய்து கொள்ளும்.
விபத்துக்குள்ளான விமானத்தில் இருக்கும் கருப்புப் பெட்டியில் உள்ள இந்த 2 முக்கிய கருவிகளைக் கொண்டு தரவுகளை மீட்டெடுத்து பகுப்பாய்வு செய்ய 15 நாள்கள் ஆகும் என்று கூறப்படுகிறது.
