தென்னாப்பிரிக்க அணி 27 ஆண்டுகளுக்குப் பிறகு முதல் ஐசிசி கோப்பையை வென்று வரலாற்றுச் சாதனை படைத்துள்ளது. தென்னாப்பிரிக்காவின் கோப்பை கனவு நிறைவேறியது குறித்து இந்தச் செய்தித் தொகுப்பில் பார்க்கலாம்.
சர்வதேச கிரிக்கெட்டில் ‘தி ரியல் கிரிக்கெட்’ என்று அனைவராலும் போற்றப்படுவது டெஸ்ட் கிரிக்கெட் மட்டுமே. ஒருநாள், டி20, டி10 மற்றும் Hundred எனப் பல ஃபார்மேட்டுகள் வந்தாலும், டெஸ்ட் கிரிக்கெட்டுக்கான ரசிகர் பட்டாளமே தனி.
அத்தகைய ரியல் கிரிக்கெட்டின், ரியல் சாம்பியனாக தென்னாப்பிரிக்கா மகுடம் சூடியுள்ளது. சுமார் 27 ஆண்டுகளாக ஐசிசியின் அனைத்து ஃபார்மேட்களிலும் கடுமையாகப் போராடி இறுதிப் போட்டி வரை வந்த தென்னாப்பிரிக்க அணி, துரதிருஷ்டவசமாக வெற்றியைத் தவறவிட்டுக்கொண்டே இருந்தது.
பல்வேறு நாக்-அவுட் போட்டிகளில் கடைசி வரை சென்று கோப்பையைத் தவறவிட்டு வந்த தென்னாப்பிரிக்க அணி, முதல் முறையாக உலக டெஸ்ட் சாம்பியன்ஷிப் பட்டம் வென்றிருக்கிறது. இங்கிலாந்தில் நடைபெற்ற உலக டெஸ்ட் சாம்பியன்ஷிப் இறுதிப் போட்டியில், ஆஸ்திரேலியாவை வீழ்த்தி சாம்பியன் பட்டம் வென்றது தென்னாப்பிரிக்கா.
வங்கதேசத்தில் கடைசியாக 1998ஆம் ஆண்டு நடைபெற்ற சாம்பியன்ஸ் டிராபி தொடரில், மேற்கிந்திய தீவுகளை 4 விக்கெட்டுகள் வித்தியாசத்தில் வீழ்த்தி தனது முதல் மற்றும் கடைசியான ஐசிசி கோப்பையை வென்றது தென்னாப்பிரிக்க அணி.
27 ஆண்டுகளுக்குப் பின் நடப்பு உலக டெஸ்ட் சாம்பியன்ஷிப் தொடர் முழுவதுமாகவே, டெம்பா பவுமா தலைமையிலான தென்னாப்பிரிக்க அணி, விளையாடிய 10 டெஸ்ட் போட்டிகளில் 9 இல் வெற்றியும், 1 இல் சமனும் செய்து ஒரு தோல்வி கூட காணவில்லை. இறுதிப் போட்டியில் நடப்பு சாம்பியன் ஆஸ்திரேலியாவை வீழ்த்தி, தி ரியல் ஜென்டில்மேன்ஸ் கேமின் சாம்பியன் பட்டத்தைக் கைப்பற்றியது.
இதுவரையில் தென்னாப்பிரிக்க அணியின் ஒவ்வொரு நாக்-அவுட் போட்டித் தோல்விகளும் கேப்டன்களின் கண்களில் கண்ணீரையும், வீரர்களின் மனங்களில் வருத்தத்தையும், ரசிகர்களின் மனதில் ஏமாற்றத்தையும் ஏற்படுத்தின. இதுவரை தென்னாப்பிரிக்கா அணி அனைத்து ஃபார்மேட்களிலும் 2 காலிறுதிப் போட்டிகள், 12 அரையிறுதிப் போட்டிகள், 1 இறுதிப் போட்டியில் தோல்வி கண்டுள்ளது.
ஐசிசி ஆடவர் உலகக் கோப்பை தொடர்களில் 1992, 1999, 2007, 2015 மற்றும் 2023 ஆகிய ஆண்டுகளில் அரையிறுதிப் போட்டியிலும், 1996 மற்றும் 2011ஆம் ஆண்டுகளில் காலிறுதிப் போட்டிகளிலும் தோல்வியைச் சந்தித்து வெளியேறியது தென்னாப்பிரிக்கா.
ஐசிசி டி20 உலகக் கோப்பை தொடர்களில் 2024இல் இறுதிப் போட்டியிலும், 2009 மற்றும் 2014 ஆம் ஆண்டுகளில் அரையிறுதிப் போட்டிகளிலும் நாக் அவுட் செய்யப்பட்டது. சாம்பியன்ஸ் டிராபி தொடர்களைப் பொறுத்தவரை 2000, 2002, 2006, 2013 மற்றும் 2025 ஆகிய ஆண்டுகளில் அரையிறுதியைத் தாண்டியதில்லை. இவ்வாறாக நாக்-அவுட் என்றாலே தடுமாறும் தென்னாப்பிரிக்கா, நீண்ட காலமாக ‘ஜோக்கர்ஸ்’ அணி என்று அழைக்கப்பட்டு வந்தது.
இத்தனை வருடங்களில் ஹான்சி க்ரோனியே, கிராமி ஸ்மித், ஏபி டிவில்லியர்ஸ், ஃபாப் டூ பிளெஸிஸ் என பல கேப்டன்களின் கனவுகளை, ஜாக்ஸ் காலிஸ், அலன் டொனால்ட், ஹர்ஷல் கிப்ஸ், மார்க் போச்சர், ஷான் பாலக் உள்ளிட்ட பல சிறந்த வீரர்களின் ஆசைகளை தற்போது நிறைவேற்றி விட்டார் டெம்பா பவுமா. 27 ஆண்டுகள் ஒரு ஐசிசி கோப்பையைக்கூடத் தொட்டுப் பார்க்காத தென்னாப்பிரிக்கா, பவுமா தலைமையில் ஐசிசி உலக டெஸ்ட் சாம்பியன்ஷிப் பட்டத்தை வென்று சரித்திரம் படைத்துள்ளது. இனி இவர்கள் ஜோக்கர்ஸ் அல்ல, சாம்பியன்ஸ்!
