கோவை அருகே உள்ள ஆசிரமத்தில் மாணவர்களை ஊழியர்கள் தாக்கியதாகக் குற்றச்சாட்டு எழுந்துள்ளது.
அன்னூர் அடுத்த நல்லகவுன்டம்பாளையம் பகுதியில் பிரபஞ்ச அமைதி ஆசிரமம் செயல்பட்டு வருகிறது. இங்கு ஆதரவற்ற மாணவர்கள் உட்பட 200-க்கும் மேற்பட்டோர் தங்கி அரசுப் பள்ளியில் கல்வி பயின்று வருகின்றனர்.
இந்நிலையில் கடந்த மாதம் பணத்தைத் திருடியதாகக் கூறி மாணவர் ஒருவர் மீது ஆசிரம ஊழியர்கள் கடுமையாகத் தாக்கியதாகக் கூறப்படுகிறது. உடல் முழுவதும் காயங்கள் ஏற்பட்டு கண்ணீருடன் அந்த மாணவர் பேசும் வீடியோ வெளியாகி அதிர்ச்சியை ஏற்படுத்தியுள்ளது.
இதேபோல் 15 வயது மாணவி ஒருவர், சக மாணவரைக் காதலித்ததாகக் கூறப்படுகிறது. இதனால் ஆசிரம ஊழியர்கள் மாணவியின் சகோதரரை வைத்து அவரை கொடூரமாகத் தாக்கி மன்னிப்பு கேட்க வைத்த சம்பவமும் அரங்கேறியுள்ளதாகத் தெரிகிறது.
