வேகமாக மாறிவரும் நவீன போர் சவால்களை எதிர்கொள்ளும் வகையில், இந்திய இராணுவத்தில் , ‘பைரவ்’ கமாண்டோ பிரிவுகளும் ‘அஷ்னி’ ட்ரோன் படைப்பிரிவுகளும் அறிமுகப்படுத்தப் படுகின்றன. அதுபற்றிய ஒரு செய்தி தொகுப்பு.
12 லட்சம் இராணுவ வீரர்கள் உள்ள இந்திய இராணுவத்தில் பைரவ் என்ற பெயரில் புதிய கமாண்டோ படை உருவாக்கப் பட்டுள்ளது. இந்தப் பிரிவுகளில் உள்ள வீரர்கள் வழக்கமான காலாட்படைக்கும் சிறப்புப் படைகளுக்கும் இடையே ஒரு பாலமாகச் செயல்படுவார்கள். திடீர்த் தாக்குதல்கள், கிளர்ச்சி எதிர்ப்பு மற்றும் எல்லை ரோந்து போன்ற உயர் தாக்கப் பணிகளை மேற்கொள்ள அவர்களுக்குப் பயிற்சி அளிக்கப்படும் என்று கூறப்பட்டுள்ளது.
எல்லை தாண்டிய பயங்கர தாக்குதல்களுக்கு விரைவான எதிர் தாக்குதல் நடவடிக்கைகளுக்காக இந்தப் புதிய கமாண்டோ படை பிரிவு உருவாக்கப் பட்டுள்ளது. லே, ஸ்ரீநகர், நக்ரோட்டா, மேற்கு இந்தியா மற்றும் வடகிழக்கு பகுதிகளின் பாதுகாப்புக்குப் பைரவ் படை பிரிவுகள் நிறுத்தப்படும் என்றும் கூறப்பட்டுள்ளது.
இந்திய ராணுவத்தின் முதல் பைரவ் படை பிரிவு வரும் நவம்பர் 1 ஆம் தேதி முதல் களத்தில் தயாராக இருக்கும் என்றும், தொடக்கத்தில் ஐந்து “பைரவ் படை பிரிவுகள்” ஏற்படுத்தப் பட உள்ளதாகவும் கூறப்பட்டுள்ளது.
ஆறு மாதங்களுக்குள் காலாட்படை, பீரங்கிகள், சிக்னல்கள் மற்றும் வான் பாதுகாப்புப் படைகளில் இருந்து 250 கமாண்டோக்களைக் கொண்ட 25 பைரவ் படை பிரிவுகள் உருவாக்கப்படும் என்று லெப்டினன்ட் ஜெனரல் அஜய் குமார் தெரிவித்துள்ளார். அதாவது மொத்தம் சுமார் 5,750 பைரவ் கமாண்டோக்கள் உருவாக்கப்படவுள்ளனர். பைரவ் கமாண்டோக்களுக்கு அவர்களின் சொந்த படைப்பிரிவுப் பயிற்சி மையங்களில் பயிற்சி அளிக்கப்படுகிறது.
மேலும், சில சிறப்புப் படைகளைப் போலவே – அதிநவீன தானியங்கி துப்பாக்கிகள் மற்றும் ஸ்னைப்பர் துப்பாக்கிகள் உள்ளிட்ட ஆயுதப்பயிற்சிகளும் அளிக்கப் படுகிறது. பைரவ் கமாண்டோக்களுக்கு கண்காணிப்பு மற்றும் தாக்குதல் ட்ரோன்கள் ஆகியவற்றிலும் பயிற்சி அளிக்கப்படுகிறது. ஆயுதங்களைக் கையாளுதல், தகவல் தொடர்பு மற்றும் மின்னணு போர், எதிரி பாலங்கள் மற்றும் முக்கியமான உள்கட்டமைப்பை வெடிக்கச் செய்தல் மற்றும் வெடிக்கும் சுரங்கப்பாதை அமைப்புகளை அமைத்தல் மற்றும் அகற்றுதல் ஆகிய பயிற்சிகளும் கொடுக்கப் படுகிறது.
புதிய பைரவ் கமாண்டோக்களுக்கு 7.62 மிமீ ரைபிள்கள், 4வது மற்றும் 5வது தலைமுறை பீரங்கி எதிர்ப்பு அமைப்புகள் மற்றும் புதிய ராக்கெட் லாஞ்சர்கள் ஆகியவை வழங்கப் பட்டுள்ளன. இதன் மூலம் இந்திய காலாட்படையின் எதிரிகளை அழிக்கும் ஆற்றல் மேம்படுத்தப் பட்டுள்ளது.
இதற்காக 4,25,000 போர் கார்பைன்களுக்கான 2,770 கோடி ரூபாய் மதிப்புள்ள ஒப்பந்தமும் கையெழுத்திடப்பட்டுள்ளது.பாரத் ஃபோர்ஜ் நிறுவனம் 60 சதவீத கார்பைன்களையும் PLR சிஸ்டம்ஸ் நிறுவனம் 40 சதவீத கார்பைன்களையும் வழங்கும் என்றும், அடுத்த ஆண்டு செப்டம்பருக்குள் இவை பயன்பாட்டுக்கு வரும் என்றும் தெரிவிக்கப் பட்டுள்ளது. இது தவிர,12 ஈட்டி ஏவுகணைகள் மற்றும் 104 ஏவுகணைகளை அமெரிக்காவிடமிருந்து கொள்முதல் செய்கிறது இந்திய இராணுவம்.
ஏற்கெனவே இந்திய இராணுவம் இரண்டு ருத்ரா படைப்பிரிவுகளை உருவாக்கி உள்ளது. வடக்கு எல்லையில் எல்ஓசிக்கு அருகில் ஒன்றும், மேற்கு எல்லையில் மற்றொன்றும் நிறுத்தப்பட்டுள்ளன. விரைவான, தன்னிறைவு பெற்ற பதிலடி திறனை உறுதி செய்வதற்காக, ருத்ரா படைப்பிரிவில் தரைப் படை, பீரங்கிகள் மற்றும் கவச வாகனங்கள், நீண்ட தூர பீரங்கிகள், ட்ரோன் பயிற்சி பெற்ற வீரர்கள், தளவாடப் பிரிவுகள் மற்றும் பைரவ் கமாண்டோ பிரிவுகள் போன்றவை ஒருங்கிணைக்கப் பட்டுள்ளன.
மேலும், ‘அஷ்னி’ என்ற ட்ரோன் படை பிரிவுகளையும் இந்திய இராணுவம் உருவாக்கியுள்ளது. இந்திய இராணுவத்தின் சுமார் 385 தரைப் படை பிரிவுகளில் ஒரு பகுதியாக ‘பைரவ்’ கமாண்டோ படை பிரிவு இணைக்கப்பட்டுள்ளது. ஒவ்வொரு படைப்பிரிவும் 10 ட்ரோன்களை இயக்கும் என்றும், அவற்றில் நான்கு கண்காணிப்புக்காகவும், ஆறு ‘காமிகேஸ்’ ட்ரோன்களின் அலைந்து திரியும் வெடிமருந்துகளாகவும் இருக்கும் என்று கூறப்பட்டுள்ளது.
மேலும், இந்த ட்ரோன்கள் நீண்ட தூரம், உயர் உளவு மற்றும் ஆபத்தான திறன்களைக் கொண்டிருக்கும் என்று தெரிவிக்கப்பட்டுள்ளது. முழுமையான போர் எங்கே நடந்தாலும் வெற்றி என்பது கைப்பற்றப்பட்ட நிலத்தை வைத்தே அளவிடப் படுகிறது. எனவே, முப்படைகளில் தரைப்படை தான் மிக முக்கியமானதாகும். அதிலும் பகைவர்களின் பராக்கிரமத்தை அழிக்கும் ருத்ரா மற்றும் பைரவ் என்ற சிவபெருமானின் பெயரால் இந்திய இராணுவத்தின் புதிய படை பிரிவுகள், எதிரிகளுக்குப் பயத்தை ஏற்படுத்தும் என்பதில் எந்த ஐயமும் இல்லை.
