பாகிஸ்தானில் வெளிப்படையாக ஜனநாயக ஆட்சி நீடித்தாலும், அதன் பின்னணியில் ராணுவத் தலைமை தளபதி அசிம் முனீர் தனது முழு அதிகாரத்தையும் ஒருங்கிணைத்து வருகிறார். அதிகாரிகள் கைப்பாவைகளாக மாறியுள்ள நிலையில், முனீர் தனக்கு நெருக்கமானவர்கள் மூலம் அரசு நிர்வாகத்தையும், உளவுத்துறையையும் தனது கட்டுப்பாட்டின் கீழ் கொண்டுவந்துள்ளதாகத் தகவல்கள் வெளியாகியுள்ளன. இதுகுறித்து சற்று விரிவாகக் காணலாம் இந்த செய்தி தொகுப்பில்.
பாகிஸ்தானில் அரசாங்கத்தைக் கவிழ்த்து ஆட்சியைப் பிடிக்க, ராணுவ தலைமை தளபதி அசிம் முனீர் திட்டமிட்டு வருவதாகக் கடந்த ஜூலை மாதம் செய்திகள் பரவின. ஆனால் சர்வதேச அளவில் அழுத்தங்களை எதிர்கொள்ள நேரிடும் என்பதால் அவர் அந்த முடிவில் இருந்து விலகியதாகக் கூறப்படுகிறது.
இதற்கு முன் நவாஸ் ஷெரீஃபை பதவியில் இருந்து நீக்கி பர்வேஸ் முஷாரஃப் ஆட்சியைக் கைப்பற்றியபோது ஏற்பட்ட சர்வதேச எதிர்ப்புகளை முனீர் மறந்திருக்க வாய்ப்பில்லை. ஆகையால்தான் தற்போது ஜனநாயகத்தை முன்னிறுத்தி நாட்டை மறைமுகமாகக் கட்டுப்படுத்தும் தந்திரத்தை அவர் தேர்ந்தெடுத்துள்ளார்.
முதற்கட்டமாக முன்னாள் பிரதமர் இம்ரான் கானை பதவியில் இருந்து அகற்றிய முனீர், அவரை சிறையில் அடைத்துத் தனது திட்டத்திற்கு தொடக்கப்புள்ளி வைத்தார். இதன் மூலம் தனக்கு எதிராக இருந்த மிகப்பெரிய அரசியல் எதிரியை முடக்கிய முனீர், அவருக்குச் சாதகமாகச் செயல்படும் அசிஃப் அலி சர்தாரியை அதிபராகவும், ஷெபாஸ் ஷெரீஃப்பை பிரதமராகவும் நியமித்தார்.
இவர்கள் இருவரும் தற்போது முனீரின் கைகளில் கைப்பாவைகளாகச் செயல்பட்டு வருவதாக அந்நாட்டு அரசியல் வட்டாரங்களே புலம்பத் தொடங்கியுள்ளன. தொடர்ந்து தனக்கு நம்பிக்கையானவர்களில் ஒருவரான ஜெனரல் அசிம் மாலிக்கை, பாகிஸ்தான் உளவுத்துறை தலைவராகவும், ஐஎஸ்ஐ தலைவராகவும், தேசிய பாதுகாப்பு ஆலோசகராகவும் நியமித்தார் முனீர். அடுத்தபடியாக முனீர் தனது மருமகனான கேப்டன் சையத் அபு ரஹ்மான் பின் காஸிம் உட்பட 10 ராணுவ அதிகாரிகளைச் சிவில் நிர்வாகத்திற்கு மாற்றினார்.
இவர்கள் மூலம்தான் அரசு நிர்வாகத்தின் ஒவ்வொரு துறையிலும் தனது கட்டுப்பாட்டை வேரூன்றச் செய்ய முயன்று வருகிறார் ராணுவ தலைமை தளபதி அசிம் முனீர். குறிப்பாக மருமகன் சையத் அபு ரஹ்மான் பின் காஸிமை பிரதமர் அலுவலக பாதுகாப்பு அதிகாரியாக நியமித்துள்ளதன் மூலம், ஷெபாஸ் ஷெரீஃபின் அனைத்து நடவடிக்கைகளையும் நெருக்கமாகக் கண்காணிக்க முயலும் முனீரின் தந்திரத்தை வெளிப்படையாக அறிந்துகொள்ள முடியும்.
இதேபோல உள்துறை அமைச்சகம், தூதரகங்கள் மற்றும் உயர் ஆணையங்களிலும் தனக்கு நம்பிக்கையானவர்களையே பணியமர்த்த முனீர் திட்டமிட்டுள்ளதாகத் தகவல்கள் வெளியாகியுள்ளன. அசிம் முனீரின் மருமகன் வருங்காலத்தில் அமெரிக்கா அல்லது இந்தியாவின் தூதராக நியமிக்கப்படலாம் என உளவுத்துறை வட்டாரங்கள் தெரிவிக்கின்றன.
இதன் மூலம் அவர் வெளிநாட்டு உளவு நடவடிக்கைகளிலும் முழு கட்டுப்பாட்டைப் பெறுவார் என எதிர்பார்க்கப்படுகிறது. அதேவேளையில், அவரது ஆட்சியை அவமதிக்கும் தஹ்ரீக்-இ-தாலிபான், பலூச் தேசியவாதப் படைகள் மற்றும் ஆப்கான் தலிபான் போன்ற உள்ளூர் பயங்கரவாத அமைப்புகள் முனீரின் லட்சியத்திற்கு மிகப்பெரும் சவாலாக இருந்து வருகின்றன.
சில பாகிஸ்தான் ராணுவத்தினரும் அண்மையில் முனீரின் உத்தரவுகளை மறுத்து வருவதாகக் கூறப்படுகிறது. குறிப்பாகக் கைபர் பகுதியில் உள்ள ராணுவப்படைகள் தலிபானுக்கு எதிராகப் போரிட மறுப்பதாகத் தகவல் வெளியாகியுள்ளது. இதன் காரணமாகத் தனது பதவி காலத்தை 2030 வரை நீட்டிக்க முனீர் வலியுறுத்தி வருவதாகத் தெரிகிறது.
ஆனால் 2027 வரை மட்டுமே பதவி காலத்தை நீட்டிக்க அரசு முடிவு செய்துள்ளதால், பாகிஸ்தான் ராணுவத்தினுள் பெரும் அதிருப்தியை ஏற்படுத்தியுள்ளது.
