விஜயதசமியையொட்டி நாகர்கோவில் அருகே உள்ள வனமாலீஸ்வரர் கோயிலில் நடந்த வித்யாரம்பம் நிகழ்ச்சியில் ஏராளமான பெற்றோர் குழந்தைகளுடன் கலந்துகொண்டனர்.
நவராத்திரி விழாவின் பத்தாம் நாளான விஜயதசமி அன்று, குழந்தைகளின் கல்வியைத் தொடங்கும் விதமாக ஏடு தொடங்கும் நிகழ்ச்சி ஆண்டுதோறும் நடத்தப்படுகிறது. அந்த வகையில், கன்னியாகுமரி மாவட்டம், பார்வதிபுரத்தில் உள்ள வனமாலீஸ்வரர் கோயிலில் குழந்தைகளுக்கான வித்யாரம்பம் நிகழ்ச்சி நடைபெற்றது.
சரஸ்வதி சன்னிதானத்தில் உள்ள குருக்கள், குழந்தைகளின் நாவில் தங்க ஊசியால் எழுதியும், அவர்களின் விரல்களைப் பிடித்து பச்சரிசியில் அகர எழுத்துகளை எழுத வைத்தும் கல்வியைத் தொடங்கி வைத்தனர். இந்த நிகழ்வில், ஏராளமான பெற்றோர் தங்கள் குழந்தைகளுடன் பங்கேற்று வழிபட்டனர்.
இதேபோல் திருத்தணியில் உள்ள தளபதி விநாயகம் மெட்ரிக் பள்ளியில் ஆயுத பூஜை மற்றும் விஜயதசமி விழா சிறப்பாக கொண்டாடப்பட்டது.
விழாவை முன்னிட்டுப் பள்ளியில் அமைக்கப்பட்டிருந்த வழிபாட்டுப் பந்தலில் விநாயகர், சரஸ்வதி மற்றும் லட்சுமி அம்மன் படங்களுக்குத் தாளாளர் பாலாஜி மலர் தூவி, தேங்காய் உடைத்து, கற்பூர ஆராதனை செய்து சிறப்பு பூஜைகள் செய்தார்.
தொடர்ந்து, பள்ளி அலுவலகம், வகுப்பறைகள் மற்றும் முன்னாள் கல்விக் குழுமத் தாளாளர் சண்முகத்தின் திருவுருவச் சிலைக்கு மாலை அணிவித்து மரியாதை செலுத்தப்பட்டது. தொடர்ந்து, பள்ளி வாகனங்களுக்கு எலுமிச்சை, தேங்காய் மற்றும் பூசணிக்காய் உடைத்து திருஷ்டி கழிக்கப்பட்டது.
விழாவின் நிறைவாக, ஆசிரியர்கள் மற்றும் பணியாளர்களுக்கு இனிப்புகள், பொரிகடலை, பழங்கள் வழங்கி வாழ்த்துகள் தெரிவிக்கப்பட்டது. இந்த நிகழ்ச்சியில் பள்ளி தலைமை ஆசிரியர் கவின், ஆசிரியர்கள் மற்றும் அறக்கட்டளை உறுப்பினர்கள் கலந்து கொண்டனர்.
