சமூக வலைத்தளங்களில் தன் முகவரியை பகிர்ந்து சிக்கலில் மாட்டிக் கொண்ட இன்ஸ்டா இன்புளூயன்சர், மதுரை வீரமணி தற்போது பல்வேறு நிறுவனங்களின் பிராண்ட் அம்பாசிடராக மாறத் தொடங்கியிருக்கிறார். மதுரையிலிருந்து தன்னுடைய வீட்டியே காலி செய்யும் நிலைக்கு தள்ளப்பட்ட இன்ஸ்டா இன்புளுயன்ஸர் வீரமணிக்கு அடித்திருக்கும் ஜாக்பாட்டை இந்த செய்தித் தொகுப்பில் பார்க்கலாம்
நடிகர் சரத்குமார் நடிப்பில் உருவான சூரிய வம்சம் படத்தில் வரும் நட்சத்திர ஜென்னலில் வானம் எட்டி பார்க்குது என்ற ஒரே பாடலில் முன்னேற வேண்டும் என்பது தான் பலரின் கனவாக இருக்கிறது. அந்த வகையில் இன்ஸ்டா பக்கத்தில் தன் முகவரியை பகிர்ந்து வெளியிட்ட ஒரே வீடியோ மதுரை வீரமணியின் வாழ்க்கையை தலைகீழாக புரட்டிப் புகழின் உச்சத்திற்கே அழைத்துச் சென்றிருக்கிறது.
நண்பர்களே….. எனத் தொடங்கி மதுரைக்கே உண்டான வட்டாரப் பேச்சோடும், நகைச்சுவை உணர்வோடும் இன்ஸ்டாகிராமின் தற்போதைய டிரெண்டிங்கில் இருப்பவர் தான் இந்த மதுரை வீரமணி. மார்க்கெட்டிங் பிரிவில் வேலை செய்து கொண்டே இன்ஸ்டாகிராமில் FUN ஆக பேசி வீடியோ போடத்தொடங்கிய வீரமணி, தனக்கு கிடைத்த வரவேற்பால் வீடியோக்களை அதிகளவில் போட வேண்டும் என்பதற்காகவே ஜெராக்ஸ் கடை ஒன்றையும் ஆரம்பித்துள்ளார்.
தன்னுடைய கடையில் இருந்தபடி வீடியோ வெளியிடுவதோடு, அதில் வரும் கமெண்ட்டுகளுக்கு பதிலையும் பதிவிட்டு வந்ததால் இன்ஸ்டாகிராம் உலகில் தனி ரசிகர் பட்டாளமே உருவானது.
விரைவில் வரவிருக்கும் தீபாவளி பண்டிகைக்காக ஸ்வீட் பாக்ஸ் அனுப்பி வைக்குமாறு தனது வீட்டு முகவரியை சமூக வலைத்தளங்களில் பதிவிட்ட வீரமணிக்கு அப்போதே பிரச்னை வரத் தொடங்கியது. முதலில் ஸ்வீட் பாக்ஸ்களை அனுப்பி வைத்த நெட்டிசன்கள் அடுத்தடுத்து கேஷ் ஆன் டெலிவரி மூலம் விலை உயர்ந்த பொருட்களையும் அனுப்பி வைக்கத் தொடங்கினர்.
டிவி, வாஷிங் மெசினில் தொடங்கி பீரங்கி வரை என கோடிக்கணக்கான மதிப்பிலான பொருளை கேஷ் ஆன் டெலிவரி ஆப்சனை பயன்படுத்தி வீரமணியில் இல்லத்திற்கு ஆர்டர்கள் குவிந்தன. ஒரு கட்டத்தில் இதனை எதிர்கொள்ள முடியாத வீரமணி, தெரியாமல் தம்முடைய முகவரியை சமூக வலைத்தளத்தில் பதிவிட்டுவிட்டேன் என மன்னிப்பு கேட்டு கண்ணீர் விட்டு கதறும் சூழலுக்கே தள்ளப்பட்டார். இருப்பினும் ஆர்டர்களின் வருகை கதவை தட்டிக் கொண்டே இருக்க வீட்டையே காலி செய்யும் முடிவுக்கு வந்த மதுரை வீரமணிக்கு இன்ப அதிர்ச்சி ஒன்று வந்து சேர்ந்தது.
தன்னுடைய நகைச்சுவை மிகுந்த பேச்சுக்களால் உலகளவில் டிரெண்டான மதுரை வீரமணிக்கு இன்ஸ்டா மார்ட் சார்பில் கணினி, உள்ளிட்ட 2 லட்சம் ரூபாய் மதிப்பிலான பொருட்களை விலையில்லாமல் வழங்கியதை வீரமணியே மகிழ்ச்சியுடன் பகிர்ந்துள்ளார். இன்ஸ்டா மார்ட்டை தொடர்ந்து பல்வேறு நிறுவனங்களும் மதுரை வீரமணியை பயன்படுத்தி தன்னுடைய தங்களை பிரபலப்படுத்தக் கூடிய வேலையில் இறங்கியுள்ளன.
அண்மையில் கேரளத்தில் உள்ள வெளிநாட்டுக்கு மாணவர்களை கல்விக்காக அனுப்பி வைக்கும் தனியார் நிறுவனம் ஒன்று வீரமணிக்கு இலவசமாக விமான டிக்கெட் போட்டுக் கொடுத்து தங்களுடைய நிகழ்வில் பங்கேற்கச் செய்துள்ளது. விமான நிலையத்திலிருந்து புறப்படும் வரை அந்த நிகழ்வில் பங்கேற்ற வரை ஒவ்வொரு நிகழ்வுகளையும் வீடியோ மூலமாக பகிர்ந்து லைக்ஸ்களையும், வியூஸ்களையும் அள்ளிக் கொண்டிருக்கிறார் இன்ஸ்டா டிரெண்டிங் வீரமணி.
நகைச்சுவை மிகுந்த பேச்சை வெளிப்படுத்திய ஜிபிமுத்து, கூமாபட்டியின் இயற்கை அழகை வீடியோவாக பதிவு செய்த கூமாபட்டி தங்கபாண்டி ஆகியோரின் வரிசையில் மதுரை வீரமணியும் இணைந்துள்ளார்.
திடீரென வீடியோக்களின் மூலமாக பிரபலமாகும் இதுபோன்ற இன்ஸ்டா இன்புளுயன்ஸர்களை தங்களின் நிறுவன பிராண்ட் அம்பாசிடராக மாற்றுவதில் முன்னணி நிறுவனங்கள் போட்டி போடத்தொடங்கியுள்ளன.
தங்களுடைய நிறுவனங்களுக்கு லட்சக்கணக்கில் செலவு செய்து விளம்பரம் எடுப்பதற்கு பதிலாக இதுபோன்ற திடீர் பிரபலமாகும் இன்ஸ்டா இன்புளுயன்சர்களை அழைத்து அதனை வீடியோவாக வெளியிட்டு பிரபலப்படுத்திக் கொள்வதைத் தான் பெரும்பாலான நிறுவனங்கள் தங்களின் உத்தியாகவே வைத்திருக்கின்றன.
தனக்கு கிடைத்த வாய்ப்பை சரியாக பயன்படுத்திக் கொண்ட கூமாபட்டி தங்கபாண்டி தற்போது பிரபல தொலைக்காட்சிகளில் முன்னணி நிகழ்ச்சிகளில் பங்கேற்று வருகிறார். கூமாபட்டி தங்கபாண்டி வரிசையில் தனக்கு கிடைத்திருக்கும் இந்த வரவேற்பையும் புகழையும் பயன்படுத்தும் முறையில் தான் மதுரை வீரமணியின் எதிர்காலமும் அடங்கியிருக்கிறது.
