4 நாட்கள் தொடர் விடுமுறையை முன்னிட்டு சென்னையில் விமானப் பயணிகள் கூட்டம் அதிகரித்துள்ளதால் டிக்கெட் கட்டணம் பல மடங்கு உயர்ந்துள்ளது.
தசரா மற்றும் ஆயுத பூஜையை முன்னிட்டு நான்கு நாட்கள் தொடர் விடுமுறை வருவதால், சென்னையில் வசிக்கும் மக்கள் குடும்பத்துடன் சொந்த ஊர்களுக்கும் சுற்றுலாத் தலங்களுக்கும் புறப்பட்டுச் செல்கின்றனர்.
இதனால் ரயில், பேருந்துகளைத் தொடர்ந்து சென்னை உள்நாட்டு விமான நிலையத்திலும் பயணிகள் கூட்டம் அதிகரித்துள்ளது. சென்னையில் இருந்து பல்வேறு நகரங்களுக்குச் செல்லும் விமானக் கட்டணங்கள் பல மடங்கு உயர்ந்துள்ளன.
சென்னை-தூத்துக்குடி விமானக் கட்டணம் வழக்கமாக 7 ஆயிரத்து 201 ரூபாயாக இருந்த நிலையில், தற்போது 17 ஆயிரத்து 363 ரூபாயாக உயர்ந்துள்ளது. சென்னை-கோவை கட்டணம் 5 ஆயிரத்து 373 ரூபாயில் இருந்து 16 ஆயிரத்து 601 ரூபாயாகவும், சென்னை-பெங்களூரு கட்டணம் 4 ஆயிரத்து 474 ரூபாயில் இருந்து 18 ஆயிரத்து 41 ரூபாயாகவும் அதிகரித்துள்ளது.
சென்னை-மும்பை கட்டணம் 22 ஆயிரத்து 353 ரூபாயாகவும், சென்னை-டெல்லி கட்டணம் 23 ஆயிரத்து 99 ரூபாயாகவும் உயர்ந்துள்ளது. விழாக்காலங்களில் விமானக் கட்டணங்களை உயர்த்தக் கூடாது என்ற அறிவுறுத்தல்கள் இருந்தும், கட்டணம் உயர்த்தப்பட்டுள்ளதாகப் பயணிகள் குற்றம்சாட்டியுள்ளனர்.
