பாரத பிரதமர் மோடியின் தலைமையிலான மத்திய அரசு இரண்டு ஆட்சிக்காலமா மக்களுக்கு பல்வேறு நலதிட்டங்களை செய்து வருவதால் , மீண்டும் பிரதமர் மோடியே ஆட்சிக்கு வரவேண்டும் என்ற நோக்கதில் பா.ஜ.க.வில் நடிகை ஜெயசுதா இணைந்துள்ளார். தெலுங்கானாவில் நடைபெற்ற நிகழ்ச்சியில் மாநில பா.ஜ.க. தலைவர் கிஷன் ரெட்டி, பா.ஜ.க. தேசிய பொதுச்செயலாளர் தருண் சங்க் ஆகியோர் முன்னிலையில் ஜெயசுதா பா.ஜ.க.வில் இணைந்தார்.
பிரபல திரைப்பட நடிகையான ஜெயசுதா சென்னையில் 17 டிசம்பர், 1958ல் பிறந்தார். 1972ல் தெலுங்குத் திரைப்படத்தில் குழந்தை நட்சத்திரமாக நடித்துள்ள இவர் 1973-ம் ஆண்டு அரங்கேற்றம் திரைப்படத்தின் மூலம் இயக்குனர் பாலசந்தர் இயக்கத்தில் தமிழில் அறிமுகமானார். அதைத்தொடர்ந்து சொல்லத்தான் நினைக்கிறேன், நான் அவனில்லை, அபூர்வ ராகங்கள் போன்ற பல்வேறுத் தமிழ்த் திரைப்படங்களிலும் நடித்துப் புகழ்பெற்றார். சமீபத்தில் இவர் நடிகர் விஜய்யின் ‘வாரிசு’ படத்தில் முக்கிய கதாபாத்திரத்தில் நடித்து உள்ளார் என்பது குறிப்பிடத்தக்கது.
இந்நிலையில் சினிமா மட்டுமின்றி அரசியலிலும் ஜெயசுதா கவனம் செலுத்தி வருகிறார். கடந்த 2009-ம் ஆண்டு ஆந்திர பிரதேச சட்டமன்றத் தேர்தலில் காங்கிரஸ் கட்சி சார்பில் செகந்திராபாத் தொகுதியில் போட்டியிட்டு எம்.எல்.ஏ.வாக தேர்ந்தெடுக்கப்பட்டார். பின்னர் 2016-ம் ஆண்டு தெலுங்கு தேசம் கட்சியில் இணைந்தார். தொடர்ந்து 2019-ல் தெலுங்கு தேசம் கட்சியில் இருந்து விலகி ஒய்.எஸ்.ஆர். காங்கிரஸ் கட்சியில் சேர்ந்தார் என்பது குறிப்பிடதக்கது.
