ஜி20 நாடுகளின் கூட்டமைப்புக்கு இந்தியா தலைமையேற்றுள்ள நிலையில், இந்தியாவின் பல்வேறு பகுதியில் ஜி20 கூட்டம் நடைபெற்று வருகிறது. இந்நிலையில், ஜி20 நாடுகளின் சுகாதார அமைச்சர்கள் கூட்டம் குஜராத்தின் காந்திநகரில் நடைபெற்றது.
இம்மாநாட்டில் சுகாதார அவசரநிலை தடுப்பு, நுண்ணுயிர் எதிர்ப்பு மற்றும் சுகாதாரக் கட்டமைப்பில் கவனம் செலுத்துதல், மருத்துவத் துறையில் ஒத்துழைப்பை வலுப்படுத்துதல், மருத்துவக் கண்டுபிடிப்புகள், உலகளாவியச் சுகாதாரக் கவரேஜ் மற்றும் சுகாதாரச் சேவை வழங்கல் குறித்து ஆலோசிக்கப்பட்டது.
தொடக்க விழாவில் கலந்துக் கொண்டு உலக சுகாதார அமைப்பின் இயக்குனர் டாக்டர். டெட்ரோஸ் பேசுகையில், ‘சுகாதாரப் பாதுகாப்பு மற்றும் திட்டங்களை மேம்படுத்தி வருவதில் இந்தியாவைப் பாராட்டினார். ஜி-20 நாடுகளின் உச்சி மாநாட்டை இந்தியா தலைமையேற்று நடத்துவதற்கு நன்றி தெரிவித்தார். இந்திய மக்கள் மற்றும் இந்திய அரசாங்கத்தின் விருந்தோம்பல் மற்றும் இந்தியாவின் சிறந்த தலைமைக்கு நன்றி தெரிவித்தார்.
உலகின் மிகப்பெரிய சுகாதார உத்தரவாத முயற்சியான ஆயுஷ்மான் பாரத் திட்டத்தை முன்னேற்றுவதில் இந்தியாவின் நடவடிக்கைகளைப் பாராட்டினார். குஜராத்தின் ‘டெலிமெடிசின்’ சிறப்பாக செயல்படுகிறது என்று கூறினார்.
மேலும், மத்திய சுகாதாரத்துறை அமைச்சர் மன்சுக் மாண்டவியா பேசுகையில், ஜி20 சுகாதார அமைச்சர்கள் கூட்டத்தில் பல்வேறு நாடுகளைச் சேர்ந்த 70-க்கும் மேற்பட்ட பிரதிநிதிகள் பங்கேற்றனர் என்றார். இந்நிகழ்ச்சியில் பிரதமர் மோடி, காணொலிக் காட்சி மூலம் பங்கேற்று உரையாற்றினார்.
