சென்னையில் போக்குவரத்து நெரிசலை குறைக்கும் வகையில், அண்ணா சாலையில் நாளை முதல், அதாவது 27 -ம் தேதி முதல் போக்குவரத்து மாற்றம் செய்யப்பட்டுள்ளது.
சென்னை ராயப்பேட்டை வெஸ்ட் காட் சாலையில் இருந்து வரும் சென்னை மாநகரப் பேருந்துகள், கனரக வாகனங்கள் மற்றும் இதர வாகனங்கள் ராயப்பேட்டை மணிக்கூண்டு அருகே திருப்பிவிடப்படும். இந்த வாகனங்கள் அனைத்தும் ஒயிட்ஸ் சாலை, ஸ்மித் சாலை வழியாக அண்ணாசாலையைச் சென்றடையும்.
இந்த வாகனங்கள் ஜி.பி. சாலை வழியாக அண்ணாசாலை செல்லவதற்கு அனுமதி கிடையாது. ஆனால், இரு சக்கர வாகனங்கள் மற்றும் இலகுரக வாகனங்கள் வழக்கம் போல் ஜி.பி. சாலை வழியாக அண்ணா சாலைக்குச் செல்லலாம்.
ஜி.பி. சாலை வழியாக அண்ணா சாலைக்கு அனுமதிக்கப்படும் இரு சக்கர வாகனங்கள், இலகுரக வாகனங்கள் வலது பக்கம் திரும்பி டேம்ஸ் சாலை வழியாகச் செல்ல முடியாது. இந்த வாகனங்கள் இடது பக்கம் திரும்பி ஸ்பென்சா் சந்திப்பில் ‘யு’ டர்ன் செய்து, அண்ணா சாலை மற்றும் டேம்ஸ் சாலை வழியாகச் செல்லலாம்.
அண்ணா சாலை – வாலாஜா சந்திப்பில் இருந்து வரும் அனைத்து வாகனங்களும் வழக்கம்போல் ஜி.பி. சாலையில் அனுமதிக்கப்பட்டு, இராயப்பேட்டை மணிக்கூண்டு வழியாகச் செல்லலாம்.
ஸ்பென்சர் சந்திப்பில் இருந்து ஜி.பி சாலையை நோக்கி வரும் வாகனங்கள், டேம்ஸ் சாலை மற்றும் பிளாக்கர்ஸ் சாலை வழியாகச் சென்று ஜி.பி. சாலையை அடையலாம் என சென்னை பெருநகர போக்குவரத்து காவல்துறை சார்பில் தெரிவிக்கப்பட்டுள்ளது.
