நிலவை ஆய்வு செய்வதற்காக, விண்ணில் செலுத்த 3 முறை திட்டமிட்டப்பட்டு, மோசமான வானிலை காரணமாக ஒத்திவைக்கப்பட்ட ஜப்பான் நாட்டின் “ஸ்லிம்” விண்கலம் இன்று வெற்றிகரமாக ஏவப்பட்டது.
அமெரிக்கா, ரஷ்யா, சீனா ஆகிய நாடுகள் நிலவின் வட துருவத்தை ஆய்வு செய்ய ஏற்கெனவே விண்கலத்தை அனுப்பி இருந்தன. இதைத் தொடர்ந்து, நிலவின் தென் துருவத்தை ஆய்வு செய்வதற்காக இந்தியா சந்திரயான்-3 விண்கலத்தை வெற்றிகரமாக விண்ணில செலுத்தியது. இந்த விண்கலம் நிலவில் வெற்றிகரமாகத் தரையிறக்கப்பட்டுத், தற்போது தனது ஆராய்ச்சி நடத்தி வருகிறது. இந்த ஆய்வில் நிலவில் கந்தகம் உள்ளிட்ட பல்வேறு கனிமங்களும், உறைந்த நிலையில் தண்ணீரும் இருப்பது கண்டுபிடிக்கப்பட்டிருக்கிறது.
இந்த நிலையில், ஜப்பான் நாட்டின் விண்வெளி ஆய்வு மையமும் நிலவை ஆய்வு செய்ய விண்கலத்தை அனுப்ப முடிவு செய்தது. இதற்கான முயற்சிகள் தொடர்ந்து நடைபெற்று வந்த நிலையில், ‘ஸ்லிம்’ என்கிற விண்கலத்தை ஜப்பான் விஞ்ஞானிகள் சமீபத்தில் உருவாக்கினர். இந்த விண்கலத்தை எச்.2-ஏ என்ற ராக்கெட் மூலம் விண்ணில் செலுத்த கடந்த மாதம் மட்டும் 3 முறை திட்டமிடப்பட்டது. ஆனால், மோசமான வானிலை உள்ளிட்ட பல்வேறு காரணங்களால் ராக்கெட் ஏவுதல் 3 முறையும் ஒத்திவைக்கப்பட்டது.
இந்த சூழலில், செப்டம்பர் 7-ம் தேதியான இன்று “ஸ்லிம்” விண்கலத்தை விண்ணில் செலுத்த முடிவு செய்யப்பட்டது. அதன்படி, தென்மேற்கு ஜப்பானில் உள்ள தனேகாஷிமா விண்வெளி மையத்தில் இருந்து எச்.2-ஏ என்கிற ராக்கெட் மூலம் “ஸ்லிம்” விண்கலம் வெற்றிகரமாக விண்ணில் செலுத்தப்பட்டது. இந்த விண்கலம் 4 முதல் 6 மாதங்களில் நிலவைச் சென்றடையும் என்று தெரிவிக்கப்பட்டிருக்கிறது. மேலும், இந்த விண்கலம் நிலவின் பாறைகளை ஆராய்வதில் முக்கியப் பங்கு வகிக்கும் எனவும் தெரிவிக்கப்பட்டிருக்கிறது.
இதுகுறித்து ஜப்பான் விண்வெளி ஆய்வு மையம் கூறுகையில், “ராக்கெட் ஏவப்பட்ட 13 நிமிடங்களுக்குப் பிறகு எக்ஸ்ரே இமேஜிங் மற்றும் ஸ்பெக்ட்ரோஸ் கோபி மிஷன் என்கிற செயற்கைக்கோள், பூமியின் சுற்று வட்டப் பாதையில் செலுத்தப்பட்டது. இது விண்மீன் திரள்களுக்கு இடையே உள்ளவற்றின் வேகத்தை ஆராயும். இந்த தகவல் மூலம் வான் பொருட்கள் உருவானது எப்படி என்பதை கண்டறியப்படும். மேலும், பிரபஞ்சம் எவ்வாறு உருவானது என்கிற மர்மத்தைத் தீர்க்கவும் வழி வகுக்கும் என்று தெரிவித்திருக்கிறது.
இத்திட்டத்தில் ஜப்பான் நாடு வெற்றி பெற்றால் நிலவில் விண்கலத்தைத் தரையிறக்கிய 5-வது நாடாக இருக்கும்.
