கேம்பஸ் இன்டர்வியூவில் மும்பை ஐ.ஐ.டி. மாணவர் ஒருவருக்கு ஆண்டுக்கு 3.7 கோடி ரூபாய் சம்பளத்தில் சர்வதேச நிறுவனத்தில் வேலை கிடைத்திருக்கிறது. இதுவரை இல்லாத அளவில் சம்பளம் கிடைத்திருப்பது மிகப்பெரிய விஷயமாகக் கருதப்படுகிறது.
மும்பை ஐ.ஐ.டி. கல்லூரியில் ஆண்டுதோறும் கேம்பஸ் இன்டர்வியூ நடைபெறும். இந்த வேலைவாய்ப்பில் இன்ஜினீயரிங் மற்றும் தொழில்நுட்ப துறையைச் சேர்ந்த அதிகபடியான மாணவர்கள், சர்வதேச நிறுவனங்களுக்கு தேர்வாவார்கள். அந்த வகையில், இந்தாண்டும் மும்பை ஐ.ஐ.டி. நிறுவனத்தில் கேம்பஸ் இண்டர்வியூ சமீபத்தில் நடைபெற்றது. இதில், அமெரிக்கா, ஜப்பான், இங்கிலாந்து, நெதர்லாந்து, ஹாங்காங் மற்றும் தைவான் ஆகிய நாடுகளில் இருந்து ஏராளமான நிறுவனங்கள் கலந்து கொண்டன.
பல்வேறு சுற்றுக்களாக நடத்தப்பட்ட இம்முகாமில், சர்வதேச நிறுவனங்களில் சுமார் 300 வேலைவாய்ப்புகள் இருந்த நிலையில், 194 இடங்கள் மாணவர்களால் நிரப்பப்பட்டது. இதில், மும்பை ஐ.ஐ.டி. மாணவர் ஒருவருக்கு ஆண்டுக்கு 3.7 கோடி ரூபாய் சம்பளத்தில் சர்வதேச நிறுவனத்தில் வேலை கிடைத்திருக்கிறது. இதன் மூலம் அந்த பட்டதாரி சர்வதேச வேலைவாய்ப்பில் இதுவரை இல்லாத அளவில் அதிக சம்பளம் பெறுபவர் என்ற சாதனையை படைத்திருக்கிறார்.
கடந்தாண்டு மும்பை ஐ.ஐ.டி. கல்லூரியில் மிக உயர்ந்த சர்வதேச வேலைக்கான வருடாந்திர சம்பளம் 2.1 கோடி ரூபாய்க இருந்தது. தற்போது அதைவிட அதிகமாகவும், இதுவரை இல்லாத அளவிலும் ஆண்டு சம்பளம் 3.7 கோடி ரூபாய் கிடைத்திருப்பது மிகப்பெரிய விஷயமாக கருதப்படுகிறது. அதேபோல, உள்நாட்டு வேலைவாய்ப்பில் அதிக வருவாயாக 1.7 கோடி ரூபாய் சம்பளத்தில் ஒரு மாணவருக்கு வேலை கிடைத்திருக்கிறது. கடந்தாண்டு உள்நாட்டு சம்பளத்தில் அதிகபட்சம் 1.8 கோடி ரூபாயாக இருந்தது. ஆனால், இந்தாண்டு 1.7 கோடி ரூபாயாக குறைந்திருக்கிறது.
வர்த்தக சந்தை பாதிப்பு காரணமாகவே உள்நாட்டு சம்பளம் குறைந்திருப்பதாகக் கூறப்படுகிறது. இது தவிர, ஆண்டு சம்பளம் 1 கோடி ரூபாய்க்கு மேல் 16 மாணவர்கள் வேலைவாய்ப்பைப் பெற்றிருக்கிறார்கள். இந்த வருவாய் பெற்ற மாணவர்களின் பெயர் விபரங்களை ஐ.ஐ.டி. நிறுவனம் வெளியிடவில்லை. கடந்தாண்டு ஜூலை முதல் இந்தாண்டு ஜூன் வரையில் நடைபெற்ற கேம்பஸ் இன்டர்வியூவில் மொத்தம் 2,174 மாணவர்கள் பதிவு செய்ததில், 1,845 பேர் பங்கேற்றனர். இவர்களில் 1,516 பேருக்கு வேலை கிடைத்திருப்பது குறிப்பிடத்தக்கது.
