ஆசிய விளையாட்டுப் போட்டிக்கு நாங்கள் சிறப்பான முறையில் தயாராகி இருப்பதால் தங்கப் பதக்கம் வெல்ல முடியும் என்று நம்புகிறோம் என்று இந்திய ஹாக்கி அணியின் கேப்டன் ஹர்மன்பிரீத் சிங் கூறியிருக்கிறார். மேலும், சீனாவில் இருந்து பதக்கத்துடன் திரும்புவதே எங்களது இலக்கு என்று துணை கேப்டன் ஹர்திக் சிங் கூறியிருக்கிறார்.
19-வது ஆசிய விளையாட்டுப் போட்டி சீனாவில் ஹாங்சோவ் நகரில் வருகிற 23-ம் தேதி தொடங்குகிறது. இந்தப் போட்டிக்கு தயாராகுவதற்காக இந்திய ஹாக்கி அணி பெங்களூருவில் உள்ள இந்திய விளையாட்டு ஆணைய மையத்தில் பயிற்சி பெற்று வந்தது.
அப்போது செய்தியாளர்களை சந்தித்த இந்திய ஹாக்கி அணியின் கேப்டன் ஹர்மன்பிரீத் சிங், “ஆசிய விளையாட்டுப் போட்டிக்காக இந்திய அணி தீவிரமாக தயாராகி இருக்கிறது. சமீபத்தில் சென்னையில் நடந்த ஆசிய சாம்பியன்ஸ் கோப்பைப் போட்டியில் நமது அணி நன்றாக விளையாடி கோப்பையை வென்றது. அத்தகைய சிறந்த செயல்பாட்டை தொடர வேண்டும் என்பதே எங்கள் குறிக்கோளாகும். எங்களது பிரிவில் சில கடினமான அணிகள் இடம் பெற்றிருக்கின்றன. இருப்பினும் நாங்கள் சிறப்பான முறையில் தயாராகி இருப்பதால் பதக்கம் வெல்ல முடியும் என்று நம்புகிறோம்” என்றார்.
அதேபோல, துணை கேப்டன் ஹர்திக் சிங் கூறுகையில், “ஆசிய போட்டிக்காக கடுமையான பயிற்சியை மேற்கொண்டிருப்பதுடன் எல்லோரும் ஒரே இலக்கை நோக்கி செயல்பட்டு வருகிறோம். நாங்கள் மன ரீதியாகவும், உடல் ரீதியாகவும் நல்ல நிலையில் போட்டிக்குச் செல்கிறோம். கடந்த சில மாதங்களை போல் தொடர்ந்து சிறப்பாக செயல்படுவதுடன் சீனாவில் இருந்து பதக்கத்துடன் திரும்புவதே எங்களது இலக்கு” என்று கூறியிருக்கிறார்.
