செல்போன் வெடித்து பெண் உயிரிழப்பு!

பாபநாசம் அருகே, செல்போனில் சார்ஜ் போட்டபடி பேசிய பெண், செல்போன் வெடித்ததில் உயிரிழந்தார்.

தஞ்சாவூர் மாவட்டம் பாபநாசம் அருகே ஆடுதுறை விசித்திர ராஜபுரத்தில் வசித்து வருபவர் கோகிலா. இவரது கணவர் சில ஆண்டுகளுக்கு முன்பு இறந்த நிலையில், தனது 9 வயதான மகன் பிரகதீஷ் உடன் தனியாக வசித்து வருகிறார்.

இவர் கபிஸ்தலத்தில் பிரகதீஷ் என்ற பெயரில் செல்போன் சரி செய்யும் கடையை நடத்தி வருகிறார்.

வழக்கம்போல் கடைக்கு வந்த கோகிலா, செல்போனை சார்ஜ் போட்டுவிட்டு, தனது பணிகளை மேற்கொண்டுள்ளார். அப்போது, செல்போனில் சார்ஜ் போட்ட படி பேசிக் கொண்டிருந்ததாக கூறப்படுகிறது.

இந்நிலையில், எதிர்பாராத விதமாக செல்போன் வெடித்ததில், கடை முழுவதும் மளமளவென தீ பரவியது. கடையின் உள்ளிருந்த கோகிலா தீயில் சிக்கிக் கொண்டு கூச்சலிட்டார். தொடர்ந்து, அப்பகுதியில் இருந்த மக்கள் தண்ணீரை ஊற்றி தீயை அணைத்தனர்.

இருப்பினும், தீயில் சிக்கிய கோகிலா, உடல் முழுவதும் கருகி சம்பவ இடத்திலேயே உயிரிழந்தார். பின்னர், கபிஸ்தலம் காவல் துறையினருக்குத் தகவல் கொடுக்கப்பட்டது. தகவலின் பேரில் சம்பவ இடத்திற்கு விரைந்து வந்த காவல்துறை, கோகிலாவின் உடலைக் கைப்பற்றி பிரேதப் பரிசோதனைக்காக பாபநாசம் அரசு மருத்துவமனைக்கு அனுப்பினர். இச்சம்பவம் குறித்து, வழக்குப் பதிவு செய்த காவல்துறை, விசாரணை மேற்கொண்டு வருகின்றனர்.

இந்நிலையில், செல்போன் வெடித்து பெண் உயிரிழந்த சம்பவம், அப்பகுதி மக்களிடையே அதிர்ச்சியையும், சோகத்தையையும் ஏற்படுத்தியுள்ளது.