விருதுநகர் மாவட்டம் ஸ்ரீவில்லிபுத்தூர் அருகே பாட்டக்குளம் சல்லிப்பட்டியில் பாண்டியர் காலத்தைச் சேர்ந்த 750 ஆண்டுகள் பழமை வாய்ந்த துலாக்கல் கல்வெட்டு கண்டுபிடிக்கப்பட்டுள்ளது.
கிணற்றிலிருந்து நீர் இறைக்கப் பயன்படும் நெம்புகோல் அமைப்பு துலா அல்லது ஏற்றம் எனப்படுகிறது. மக்கள் பயன்பாட்டுக்குத் தேவையான மழைநீர் கிடைக்காமல் கண்மாய், குளங்கள் வறண்டு இருக்கும் போது, கிணறுகள் தோண்டப்பட்டு பயன்படுத்தப்படுவது வழக்கம்.
இத்தகைய கிணறுகளை அப்பகுதிகளின் ஆட்சியாளர்கள், வணிகர்கள் போன்றோர் அமைத்துத் தந்துள்ளார்கள். இது போன்ற கிணறுகள் பாண்டியர் காலம் முதல் வழக்கத்தில் உள்ளது.
கோயில் அருகில் வெட்டப்பட்டுள்ள கிணறுகள், திருமஞ்சன கிணறுகள் என்றும், வழிப்பாதைகளில் அமைந்துள்ள கிணறுகள், பொதுக்குடிநீர் கிணறுகள் என்றும் அழைக்கப்படுகிறது.
இந்நிலையில், இராமநாதபுரம் தொல்லியல் ஆய்வு நிறுவனத்தில் தலைவர் ராஜகுரு, நுார்சாகிபுரம் சிவக்குமார் கூறியதாவது:
இதுகுறித்து, இராமநாதபுரம் தொல்லியல் ஆய்வு நிறுவனத்தின் தலைவர் ராஜகுரு கூறியதாவது, பாட்டக்குளம் சல்லிப்பட்டி பாலாண்டி அய்யனார் கோயில் முன்பு 7 அடி உயரமும், ஒன்றரை அடி அகலமும், மேற்பகுதி குறுகலாகவும் உள்ள செவ்வக வடிவிலான ஒரு கல் தூண் உள்ளது.
இந்த கல் தூணின் கீழ்ப்பகுதியில் 5 வரியில் அமைந்த ஒரு கல்வெட்டு உள்ளது. இதில் ஸ்வஸ்திஸ்ரீ இத்தன்மம் அரியான் சோறனான விசைய கங்கர் செய்தது என எழுதப்பட்டுள்ளது.
இக்கோயில் பாட்டக்குளம் கண்மாய் கரையில் அமைந்துள்ளது. இது கிணற்றிலிருந்து நீர் இறைக்கப் பயன்படும் ஒரு துலாக்கல்.
அரியான் சோறனான விசைய கங்கர் என்பவர் கிணற்றையும், துலாக்கல்லையும் அமைத்து கொடுத்துள்ளார்.
கல்வெட்டு எழுதியதைக் கொண்டு, இது பிற்கால பாண்டியர்களின் கி.பி.13 முதல் 14-ஆம் நூற்றாண்டைச் சேர்ந்தது என கருதலாம் என்று தெரிவித்தனர்.
